75-годдзю Перамогі ў Вялікай Айчыннай вайне прысвячаецца новы праект Нацыянальнай бібліятэкі Беларусі – “100 дзён да Вялікай Перамогі. Па старонках беларускіх газет 1945 г.”.
З 30 студзеня па 9 мая 2020 г. штодня на партале бібліятэкі публікуюцца матэрыялы, якія адлюстроўваюць хроніку навін і падзей з публікацый адпаведнага перыяду ў газетах Савецкай Беларусі 1945 г.
Наступленне савецкіх войскаў у Венгрыі. Баявы самалёт – на грошы калгаснікаў. Тавары для насельніцтва. Газеты: “Советская Белоруссия” (№ 22); “Калгаснік Заслаўшчыны” (Заслаўскі раён Мінскай вобласці, № 9).
У адказ на паспяховае наступленне нашых войскаў у Венгрыі, як паведамляе газета “Калгаснік Заслаўшчыны” (№ 9), “колхозники сельхозартели Мостокского сельсовета Могилёвского района собрали 100 500 рублей из своих личных сбережений на строительство боевого самолёта”.
Аўтар аднаго з артыкулаў распавядае пра адкрыццё ў Заслаўскім раёне швейнай і абутковай арцелі. Прапануе арганізаваць у раёне вытворчасць тавараў, недахоп якіх ужо істотна адчуваўся – гэта гліняны і драўляны посуд, мэбля, цэгла, лесапіламатэрыялы і шмат чаго іншага, гаворыць пра неабходнасць адкрыць фарбавальні майстэрні па вырабе цацак, раіць займацца перапрацоўкай ягад.
Гэтаму артыкулу адпавядае матэрыял у “Советской Белоруссии” (№ 22) за 2 лютага: “1 февраля в Минске открылось республиканское совещание работников местной промышленности и промкооперации”, на ім, у прыватнасці, былі названы тавары, у якіх мелі патрэбу жыхары: лямпавыя гарэлкі, прымусныя іголкі, нажы, лыжкі, відэльцы, табурэткі, абедзенныя і пісьмовыя сталы, крэслы, шчоткі, аконная арматура, рыдлёўкі, збруя.
Краіна мела патрэбу нават у такіх “дробязях” – іх трэба было аднаўляць наноў...
Заставалася 98 дзён да Перамогі...
Аўтар публікацыі: Л. Тупчыенка-Кадырава, аддзел карпаратыўнага ўзаемадзеяння НББ.
Усе матэрыялы праекта даступны на партале НББ і сайце “Беларусь у інфармацыйнай прасторы”.
