75-годдзю Перамогі ў Вялікай Айчыннай вайне прысвячаецца новы праект Нацыянальнай бібліятэкі Беларусі – “100 дзён да Вялікай Перамогі. Па старонках беларускіх газет 1945 г.”.
З 30 студзеня па 9 мая 2020 г. штодня на партале бібліятэкі публікуюцца матэрыялы, якія адлюстроўваюць хроніку навін і падзей з публікацый адпаведнага перыяду ў газетах Савецкай Беларусі 1945 г.
Налёты савецкай авіяцыі на гарады Германіі. Становішча ў Берліне. Падрыхтоўка да святкавання Дня Чырвонай арміі. Газета “Ленінская праўда” (Дзяржынскі раён) (№ 13).
Саўінфармбюро ў зводцы за папярэдні дзень паведаміла аб налётах нашай авіяцыі на чыгуначныя вузлы і ваенныя аб'екты ў нямецкіх гарадах Штэцін, Штаргард і Брэслау. Гарэлі эшалоны, склады, ваенна-прамысловыя аб'екты. (Горад-порт Штэцін на Балтыйскім моры і горад Штаргард пасля заканчэння вайны рашэннем Патсдамскай канферэнцыі былі перададзены польскаму боку і перайменаваны ў Шчэцін і Старгард, Брэслау таксама стаў польскім Вроцлавам).
Замежныя крыніцы (у аднайменнай нататцы) распавядаюць аб становішчы ў Берліне – сюды працягваюць прыбываць цягнікі з бежанцамі. Людзі бягуць і з Берліна: па дарозе на Любек пешая калона бежанцаў расцягнулася на 20 кіламетраў. У сталіцы Германіі перасталі аднаўляць разбураныя будынкі – гэты будаўнічы “матэрыял” выкарыстоўваюць для ўзвядзення барыкад.
А ў Беларусі рыхтуюцца адсвяткаваць Дзень Чырвонай арміі! Да гэтай падзеі ў раёне прымеркаваны лыжныя спаборніцтвы і здача норм спартыўна-фізкультурнага комплексу ГПА (“Гатовы да працы і абароны”). Школьнікі чакаюць сустрэчы з франтавікамі, рыхтуюць для іх падарункі, танцавальныя і песенныя нумары, спектакль з сімвалічнай назвай “Шчасце” (“Ленінская праўда” (Дзяржынскі раён), № 13).
Да Перамогі застаецца 77 дзён...
Аўтар публікацыі: Л. Тупчыенка-Кадырава, аддзел карпаратыўнага ўзаемадзеяння.
Усе матэрыялы праекта даступны на партале НББ і сайце “Беларусь у інфармацыйнай прасторы”.
