4 красавіка ў бібліятэцы адбылося адкрыццё выстаўкі “Ад Нёмана да Ціхага акіяна: гісторыя вандровак і геаграфічных даследаванняў”, прымеркаванай да 70-годдзя Беларускага геаграфічнага таварыства і 90-годдзя факультэта геаграфіі і геаінфарматыкі Беларускага дзяржаўнага ўніверсітэта.
Экспазіцыя складаецца з двух асноўных раздзелаў і дае нагляднае ўяўленне пра станаўленне геаграфіі ў нашай краіне і ўнёсак славутых першапраходцаў – выхадцаў з Беларусі, увекавечаных у падручніках і геаграфічных картах свету. Сярод экспанатаў выстаўкі – рэдкія кнігі, карты і эстампы ХIХ ст., а таксама сучасная тэматычная навуковая і навукова-папулярная літаратура, партрэты і кароткія біяграфічныя звесткі пра знакамітых беларускіх падарожнікаў і географаў з фондаў Нацыянальнай бібліятэкі, калекцыя карт Беларускага геаграфічнага таварыства, геадэзічнае абсталяванне з калекцыі Віктара Нікандравіча Вексіна.
Першы раздзел – “Гісторыя вандровак і геаграфічных даследаванняў выхадцаў з Беларусі ў асобах” – ахоплівае перыяд з ХІІ па XIX ст. і звязаны з даследаваннямі нашых землякоў у розных краінах свету. Большасць з іх не былі прафесійнымі географамі, але ажыццявілі цікавыя падарожжы, праславілі сябе геаграфічнымі знаходкамі, складзенымі картамі, цікавымі пуцяводнымі нататкамі, якія можна лічыць геаграфічнымі дакументамі, навуковымі працамі ў галіне прыродазнаўства, этнаграфіі, сацыяльна-эканамічнай геаграфіі. Сярод іх – Еўфрасіння Полацкая, Мікалай Радзівіл Сіротка, Саламея Русецкая – асобы, чые вандроўкі былі ўвекавечаны ў кніжных помніках агіяграфічнай і мемуарнай літаратуры, Міхась Врончанка – адзін з заснавальнікаў Рускага геаграфічнага таварыства, Мікалай Судзілоўскі – адкрывальнік шэрага астравоў цэнтральнай часткі Ціхага акіяна, Ігнат Дамейка – славуты даследчык Паўднёвай Амерыкі, Канстанцін Валасовіч – заснавальнік чацвярцічнай геалогіі і палеаграфіі Еўрапейскай Поўначы і Запаляр’я і інш.
Другі раздзел экспазіцыі “Навуковыя школы і даследаванні ў галіне навук аб Зямлі па напрамках”, прысвечаны афармленню геаграфічнай навукі Беларусі ў першай трэці ХХ ст. і дзейнасці розных школ і інстытуцый у сучасным перыядзе. З 1919 г. актывізавалася вывучэнне прыродных умоў і гаспадаркі Беларусі як самастойнай рэспублікі (у складзе СССР). З’явіліся навучальныя і навуковыя ўстановы, былі заснаваны Беларускі дзяржаўны ўніверсітэт і Акадэмія навук Беларусі. У шэрагу дакументаў экспазіцыі матэрыялы па эканамічнай геаграфіі Беларусі, геалогіі, гідралогіі, глебазнаўству, ландшафтазнаўству, метэаралогіі і кліматалогіі, геаэкалогіі, сярод якіх вылучаюцца яркія прадстаўнікі і кіраўнікі адпаведных навуковых школ – Аркадзь Смоліч, Міхаіл Азбукін, Гаўрыіл і Радзім Гарэцкія, Канстанцін Лукашоў, Аляксей Кайгародаў, Іван Юркевіч, Вольга Якушка і інш.
У рамках адкрыцця адбылася прэзентацыя трох кніг: “Географы Беларуси. Биографический справочник”, “Пружанский край на старинных картах”, “Пружанская кулинария: 76 уникальных рецептов”.
У мерапрыемтсве ўзялі ўдзел генеральны дырэктар Нацыянальнай бібліятэкі Беларусі Вадзім Гігін, старшыня Апякунскай рады Беларускага геаграфічнага таварыства Аляксандр Зайцаў, дэкан факультэта геаграфіі і геаінфарматыкі Беларускага дзяржаўнага ўніверсітэта, доктар геаграфічных навук, дацэнт Алена Кальмакова, старшыня Беларускага геаграфічнага таварыства Аляксей Яротаў, калекцыянер геадэзічнага абсталявання, дырэктар кампаніі “Геакарт”, выкладчык Беларускага нацыянальнага тэхнічнага ўніверсітэта Віктар Вексін.
Запрашаем здзейсніць цікавае і пазнавальнае падарожжа разам з Нацыянальнай бібліятэкай і Беларускім геаграфічным таварыствам!
Выстаўка будзе працаваць да 21 красавіка 2024 г.
Дата яе заканчэння можа быць зменена.
Уваход – па чытацкім білеце або білеце сацыякультурнага цэнтра.
Час работы выставы адпавядае рэжыму работы бібліятэкі.
Тэлефон: (8 017) 368 37 37.
Матэрыял пададзены аддзелам сувязей з грамадскасцю.
З 16 красавіка па 21 мая ў галерэі “Панарама” працуе выстава фотавыстава “Жывыя камяні Антарктыды”, прымеркаваная да 70-годдзя Беларускага геаграфічнага таварыства.
