Усевалад Швайба – беларускі мастак, член Беларускага саюза мастакоў, удзельнік шматлікіх рэспубліканскіх і міжнародных выставак і праектаў, у тым ліку маштабных зборных праектаў Нацыянальнай бібліятэкі Беларусі, лаўрэат і пераможца мастацкіх конкурсаў. Работы аўтара знаходзяцца ў галерэях, музеях і калекцыях у Беларусі і за мяжой.

Экспазіцыя раскрывае чароўны і ўнікальны свет мастацкіх вобразаў Усевалада Швайбы, знаёміць з своеасаблівасцю яго тэхнічных і філасофскіх вынаходак, якія вельмі індывідуальна і характэрна складаюць непаўторную мазаіку зместу, сімвалаў, асоб і форм. Мастак вынаходзіць у постацях, сюжэтах, тварах сімвалічнасць і глыбокую мудрасць, распавядае пра падтэкст і глыбіню сэнсаў.

Прадстаўленыя работы выкананыя ў розных графічных тэхніках – дрэварыт, туш, пяро, літаграфія, афорт, лінарыт. Ва ўнісон графічным лістам гучаць жывапісныя работы мастака. Графіка і жывапіс не спрачаюцца, а ўвасабляюць адзіную канцэпцыю рознымі мастацкімі сродкамі, поўнымі своеасаблівасці, даюць магчымасць убачыць свет праз прызму ўяўлення мастака. Сюжэты работ напоўнены метафізічнасцю, пластыкай, структурнасцю, прыгажосцю. Мастак вынаходзіць міфічнасць і казачнасць звычайных ліній і твараў.

Арганізатарамі выстаўкі выступілі Нацыянальная бібліятэка Беларусі і Беларускі саюз мастакоў.

На вернісаж уваход вольны, у астатні час – па чытацкім білеце або білеце сацыякультурнага цэнтра.

Выстаўка будзе працаваць да 3 кастрычніка 2021 г.
Дата заканчэння працы экспазіцыі можа быць зменена.

Тэлефон для даведак: (8 017) 368 37 37

E-mail: pr@nlb.by