Дата правядзення
Час правядзення
Месца правядзення
Юбілейная выстаўка “Мы прыйшлі на зямлю, каб любіць”, прысвечаная 75-годдзю беларускага паэта, перакладчыка, публіцыста, заслужанага дзеяча культуры Беларусі Генадзя Пятровіча Пашкова, праходзіць з 22 сакавіка па 30 красавіка ў зале беларускай літаратуры (пам. 205).
Генадзь Пашкоў належыць да таго пісьменніцкага пакалення, актыўнае творчае станаўленне якога прыпала на 1970-я. Друкавацца паэт пачаў яшчэ ў юнацкія гады і ўвайшоў у беларускую паэзію молада і ўпэўнена. Майстар слова істотна ўзбагаціў нацыянальную літаратуру яркімі мастацкімі вобразамі, стварыў шэдэўры інтымнай, пейзажнай і філасофскай лірыкі. Галоўныя крыніцы яго творчага натхнення – непаўторная беларуская прырода, уласны духоўны досвед і багатыя жыццёвыя назіранні.
У раздзеле выстаўкі “Зямное і вечнае” можна пазнаёміцца творчасцю паэта. Першыя вершы былі надрукаваны ў калектыўным зборніку маладых універсітэцкіх паэтаў “Натхненне” (1967). У 1975 г. Пашкоў заявіў пра сябе кнігай паэзіі з мілагучнай назвай “Кляновік”, дзе сабраны ў асноўным пейзажныя замалёўкі. У 1977 г. выйшаў зборнік яго нарысаў “Будзень як свята”. З невялікім часовым прамежкам былі выдадзены кнігі самага рознага жанравага дыяпазону: “Дыстанцыя небяспекі”, “Красный жаворонок”, “Гравюры дарог”, “Зямлю слухаю”, “Маналог на кастрышчы”, “Крокі”, “Люблю, спадзяюся, жыву…”, “Журавінавы востраў”, “Палескія вандроўнікі”, “Пціч”, “Маё лета”, “Зорнае поле”, “Колькі ў небе зор…: Смаргоншчына літаратурная...”. У раздзеле экспануюцца таксама зборнікі паэзіі для дзяцей: “Дзяўчынка з блакітным мячыкам”, “Вясёлыя канікулы”, “У далонях свету” і г.д.
У раздзеле “З голасам чыстым і звонкім” прадстаўлены паэтычныя зборнікі Г. Пашкова, у якіх гучыць роздум пра будучыню, гісторыю і культуру роднага краю, сэнс чалавечага існавання, складанасць часу, асэнсаванне ўбачанага ў іншых краінах, тэма кахання. Ім створаны паэтычныя вобразы М. Багдановіча, Я. Купалы, Ф. Скарыны. Вершы паэта рамантычна-ўзнёслыя, глыбока лірычныя. Яго творы прывабліваюць маляўнічымі краявідамі, шматгалоссем лесу і поля, водарам лугавых траў, белізной снегавых прастораў, сонечнымі фарбамі. Прагучала ў паэзіі Пашкова і трагедыя чарнобыльскай бяды. Новыя вершы і паэмы, напісаныя ў апошнія гады, увайшлі ў зборнік “Тваім святлом благаславены”. Кніга напоўнена чысцінёй і святлом пачуццяў да самага дарагога ў жыцці паэта – да жанчыны, да зямлі, дзе нарадзіўся і жыве.
Генадзь Пятровіч не абмяжоўваецца адной творчай дзейнасцю, яго захапляе рэдакцыйная і перакладчыцкая справа. Вынікі гэтай працы змешчаны ў адпаведным раздзеле выстаўкі.
Прадстаўленыя ў экспазіцыі кнігі можна заказаць праз электронны каталог Нацыянальнай бібліятэкі Беларусі.
Час работы выстаўкі адпавядае рэжыму работы бібліятэкі.
Уваход – па чытацкім білеце або білеце сацыякультурнага цэнтра.
Тэлефон для даведак: (8 017) 293 27 16.
Матэрыял пададзены аддзелам абслугоўвання спецыялізаванымі фондамі.