Дзіўны Пакістан у галерэі Нацыянальнай бібліятэкі Беларусі

6 чэрвеня ў галерэі “Атрыум” (3-ці паверх) адбылося адкрыццё выставы “Асобы Пакістана”, прымеркаванай да Дня Незалежнасці Ісламскай Рэспублікі Пакістан.

Пакістан – мультыэтнічная, мультыкультурная і мультымоўная краіна. Яе традыцыі – складанае перапляценне тысячагадовай гісторыі і наватарскіх сучасных элементаў, самабытных культур, звычаяў дзясяткаў народнасцей, якія насяляюць краіну. Культуры Пакістана ўласцівыя шматгалоссе стыляў, глыбіня і тонкі сімвалізм, што выразна прасочваецца ў вобразах жыхароў краіны, а таксама ў малюнках знакавых для яе культуры архітэктурных пабудоў.

Экспазіцыя прадстаўляе працы выбітных пакістанскіх мастакоў Імрана Хана і Зайнеб Хан, а таксама фатографаў Адыля Чышці і Асмара Хусейна.

Імран Хан – знакаміты акварэліст, уладальнік мноства ўзнагарод, пераможца шэрагу нацыянальных конкурсаў. Мастак працуе ў жанры акварэльнага партрэта, пейзажа, адлюстроўвае гістарычную архітэктуру і паўсядзённае жыццё Пакістана. Манеры Імрана ўласціва лёгкасць, яркасць, неперагружанасць дэталямі. Асабліва вядомы мастак віртуознымі і тонка выкананымі партрэтамі, уменнем перадаць характэрныя рысы і асаблівасці традыцыйнага вобраза мадэлей.

Зайнеб Хан – удзельніца шматлікіх выстаў і ўладальніца шэрагу ўзнагарод, у тым ліку мастацкай прэміі імя Заіры Закі (2022). Працы Зайнеб выкананы ў алеі і акрыле. У аўтарскай манеры мастачка адлюстроўвае архітэктуру і пейзажы Пакістана, якія глыбока яе ўразілі, імкнецца перадаць прыгажосць краіны, багатую культуру і маляўнічую атмасферу.

Адыль Чышці – фатограф, выкладчык, эксперт міжнародных конкурсаў, удзельнік міжнародных выстаў, уладальнік мноства ўзнагарод. Яго працы публікаваліся ў такіх прэстыжных выданнях, як Forbes, NatGeo і BBC Hindi. Адыль адлюстроўвае фрагменты вулічнага жыцця, вынікі назіранняў, поўныя жвавасці, эмацыянальнасці, метафарычнасці, – застылыя ў кадры імгненні паўсядзённасці.

Асмар Хусейн – вядомы пакістанскі фатограф, уладальнік мноства ўзнагарод, удзельнік шматлікіх выстаў. Яго партрэты, пейзажы, здымкі архітэктуры захапляюць увагай да дэталяў, эмоцый, натуральнасці. Здольнасць фатографа канцэнтравацца на сутнасці, падтэксце, унутраным пасыле прадмета здымкі асабліва натхняе і матывуе фатографаў-пачаткоўцаў Пакістана і іншых краін.

Дапаўняюць экспазіцыю традыцыйныя прадметы побыту: керамічныя вазы, сталовыя прыборы, сурвэткі, мініяцюрныя скульптуры, вырабы з оніксу, дрэва, медзі, вярблюджай скуры, вышытыя ўручную.

Акварэль, жывапіс, фатаграфія, дэкаратыўнае мастацтва даюць магчымасць прайсціся па вуліцах экзатычнай краіны, скрозь адлегласць пагутарыць з яе вядомымі мастакамі, фатографамі, уразіцца іх знаходкамі і высновамі, загледзецца, захапіцца чарадой партрэтаў жыхароў Пакістана, адчуць разнастайнасць, глыбіню іх паўсядзённай культуры, асаблівую вернасць традыцыям... Выстава стварае сучасны партрэт Пакістана.

Яе арганізатарамі выступілі Нацыянальная бібліятэка Беларусі і Пасольства Ісламскай Рэспублікі Пакістан у Рэспубліцы Беларусь.

Час работы выстаўкі адпавядае рэжыму работы бібліятэкі.
Уваход – па чытацкім білеце або білеце сацыякультурнага цэнтра.

Тэлефон для даведак: (8 017) 368 37 37.