З 2 верасня па 2 кастрычніка ў зале дакументаў міжнародных арганізацый (пам. 207g) адкрыта тэматычная выстава “Пісьменнасць у лічбавым свеце: праблемы, дасягненні, перспектывы”, прымеркаваная да Міжнароднага дня пісьменнасці.

Гэты Дзень адзначаецца штогод 8 верасня, пачынаючы з 1966 года. Ён быў заснаваны ЮНЕСКА па рэкамендацыі Сусветнай канферэнцыі міністраў адукацыі па ліквідацыі непісьменнасці, якая адбылася ў Тэгеране ў верасні 1965 года.

Святкаванне Міжнароднага дня пісьменнасці – гэта магчымасць нагадаць грамадству пра важнасць пісьменнасці ў кантэксце чалавечай годнасці і праў чалавека, а таксама з мэтай актывізацыі намаганняў па стварэнні больш пісьменных і ўстойлівых грамадстваў.

Прапанаваная чытачам выстава налічвае каля 80 дакументаў на рускай, англійскай і нямецкай мовах. Гэта кнігі, перыядычныя выданні, мімеаграфаваныя матэрыялы ААН, брашуры, буклеты.

Дакументы раскрываюць шматгранную дзейнасць ААН, ЮНЕСКА і іншых міжнародных арганізацый, накіраваную на павышэнне ўзроўню пісьменнасці ва ўсім свеце.

Прадстаўленая экспазіцыя пазнаёміць чытача з міжнароднымі праграмамі адукацыі, рознымі формамі навучання, вынікамі міжнароднага супрацоўніцтва ў дадзенай сферы, з развіццём сістэмы адукацыі ў Рэспубліцы Беларусь.

Сярод дакументаў – матэрыялы Сусветнага форуму па адукацыі і праграма ЮНЕСКА “Адукацыя для ўсіх”, аналітычныя агляды сусветных тэндэнцый развіцця навукова-адукацыйнай дзейнасці, зборнікі навуковых артыкулаў, матэрыялы навукова-практычных канферэнцый, манаграфіі і інш.

Экспазіцыя ўключае наступныя тэматычныя раздзелы:

Пісьменнасць і адукацыя для ўстойлівага развіцця
Распаўсюджванне пісьменнасці і базавая адукацыя для дарослых. Навучанне на працягу ўсяго жыцця. Праграма ЮНЕСКА “Адукацыя для ўсіх”
Міжнароднае і рэгіянальнае супрацоўніцтва ў галіне адукацыі. Балонскі працэс. Міжнародныя абмены
Сістэма адукацыі і яе ўдасканаленне ў Рэспубліцы Беларусь

Выстава будзе цікавая спецыялістам у галіне адукацыі, выкладчыкам ВНУ і агульнаадукацыйных школ, студэнтам, а таксама ўсім, хто цікавіцца сучаснымі праблемамі развіцця адукацыі.

Пераадоленне непісьменнасці – ключавы кампанент Мэт у галіне ўстойлівага развіцця ААН, сфармуляваных у Парадку дня ў галіне ўстойлівага развіцця на перыяд да 2030 года. Гэты 15-гадовы план дзеянняў, прыняты сусветнымі лідарамі ў верасні 2015 года, уключае ў сябе забеспячэнне ўсеагульнай якаснай адукацыі і заахвочванне навучання на працягу ўсяго жыцця.

Па даных ЮНЕСКА, нягледзячы на значны рост узроўню адукаванасці за апошнія 50 гадоў, у свеце па-ранейшаму налічваецца 773 млн непісьменных дарослых, а 617 млн дзяцей і падлеткаў не валодаюць і мінімальнымі навыкамі чытання і матэматыкі. У мноства дзяцей, маладых людзей і дарослых, ахопленых школьнымі або іншымі адукацыйнымі праграмамі, атрыманыя веды не адпавядаюць неабходнаму ўзроўню пісьменнасці ва ўмовах сённяшняга свету, які становіцца ўсё больш складаным.

Міжнародны дзень пісьменнасці шырока адзначаюць і ў Беларусі. У розных гарадах краіны праходзяць выставы, фестывалі, адукацыйныя акцыі, прымеркаваныя да гэтага свята. Узровень пісьменнасці дарослага насельніцтва Беларусі заўсёды быў адным з самых высокіх у свеце – сёння ён дасягае 99,9 %.

Карысныя спасылкі:

Дакументы:

Са спiсамi лiтаратуры да тэматычных выставак можна азнаёмiцца ў раздзеле “Спісы літаратуры да выстаў за 2023 год”.

Час работы выставы адпавядае рэжыму работы бібліятэкі.
Уваход – па чытацкім білеце або білеце сацыякультурнага цэнтра.

Тэлефон для даведак: (8 017) 293 27 34.

Матэрыял пададзены аддзелам абслугоўвання афіцыйнымі дакументамі.