Дата правядзення
Час правядзення
Месца правядзення
12 верасня ў рамках Дзён культуры Рэспублікі Татарстан у Рэспубліцы Беларусь у Нацыянальнай бібліятэцы Беларусі адбылося адкрыццё кніжнай выставы “Рэспубліка Татарстан: кнігі ў прасторы культуры”.
З прывітальным словам на яе адкрыцці выступілі міністр культуры Рэспублікі Беларусь Анатоль Маркевіч і міністр культуры Рэспублікі Татарстан Ірада Аюпава. У мерапрыемстве таксама ўзялі ўдзел генеральны дырэктар Нацыянальнай бібліятэкі Беларусі Вадзім Гігін, дырэктар Нацыянальнай бібліятэкі Рэспублікі Татарстан Мадзіна Цімерзянава, прадстаўнікі творчай інтэлігенцыі і бібліятэчнай супольнасці.
У экспазіцыі прадстаўлена больш за 150 кніг: ад энцыклапедычных да рэпрынтных выданняў. Калекцыя складзена так, што наведвальнікі могуць атрымаць шырокія веды пра гісторыю татар і Татарстана з найстаражытнейшых часоў да навейшай гісторыі, пра знакамітых асоб-татар, якія ўнеслі значны ўклад у развіццё Расійскай Федэрацыі, а таксама пра знакамітых людзей, якія служылі росквіту Татарстана.
Тут прадстаўлены альбомы аб найбагацейшых музейных калекцыях Татарстана і кнігі аб народных промыслах, скураной мазаіцы, разьбе па дрэве, чаканцы, традыцыйных нацыянальных святах народаў, якія пражываюць у рэспубліцы, працы, прысвечаныя развіццю тэатраў рэспублікі, даследаванню нацыянальнага касцюма, кнігі па кіно і фотамастацтве.
Сярод экспанатаў – 26 выданняў на татарскай мове. Татары Беларусі могуць далучыцца да літаратуры на роднай мове.
Кнігі перададзены ў дар Нацыянальнай бібліятэцы Беларусі. Калекцыю дапоўнілі алічбаваныя арыгіналы арабаграфічных рукапісаў на старабеларускай мове, якія захоўваюцца ў рэдкім фондзе Нацыянальнай бібліятэкі Рэспублікі Татарстан.
У рамках мерапрыемства адбылася сустрэча творчай інтэлігенцыі Беларусі і Татарстана. Галоўная тэма – культурнае супрацоўніцтва дзвюх рэспублік. Абодва бакі выказалі зацікаўленасць ва ўсталяванні доўгатэрміновых культурных сувязей. Былі падпісаны пагадненні паміж Дзяржаўным гісторыка-архітэктурным і мастацкім музеем-запаведнікам “Казанскі Крэмль” і Замкавым комплексам “Мір”, Нацыянальным музеем Рэспублікі Татарстан і Нацыянальным гістарычным музеем Рэспублікі Беларусь, Нацыянальным музеем Рэспублікі Татарстан і Нацыянальным мастацкім музеем Рэспублікі Беларусь.
Для ганаровых гасцей правялі экскурсію па “алмазе ведаў”, пазнаёмілі са стогадовай гісторыяй і архітэктурай установы.
У рамках сустрэчы бакі абмяняліся памятнымі падарункамі.
З выставай можна азнаёміцца ў галерэі “Атрыум” да 24 верасня 2023 года.
Матэрыял пададзены аддзелам сувязей з грамадскасцю.