У люстэрку лёсу

Юбілейная выстаўка “У люстэрку лёсу”, прысвечаная 120-годдзю з дня нараджэння беларускага пісьменніка, заслужанага дзеяча культуры Беларусі Піліпа Пестрака (1903–1978), праходзіць з 1 па 30 лістапада ў зале беларускай літаратуры (пам. 205).

Творчасць Піліпа Пестрака займае віднае месца ў беларускай савецкай літаратуры. Вернасць жыццёвай праўдзе – найважнейшая рыса ўсёй творчасці Піліпа Cямёнавіча. Пісьменнік-патрыёт, чыя творчая дзейнасць арганічна звязана з лёсам Заходняй Беларусі, пясняр барацьбы, вялікі чалавекалюб, Піліп Пестрак – самая каларытная фігура ў пасляваеннай беларускай літаратуры.

У першым раздзеле выстаўкі “З глыбінь перажытага” прадстаўлены зборы твораў пісьменніка ў 4-х і 5-ці тамах, зборнікі апавяданняў (“Першыя усходы”, “Лясная песня”, “Сярод чаротаў”) і вершаў (“На варце”, “За сваю Айчыну”, “Падарожнае” і інш.), успаміны, літаратурна-крытычныя і публіцыстычныя артыкулы, нарысы. Найбольш глыбокае ўвасабленне тэма барацьбы народных мас Заходняй Беларусі за сваё сацыяльнае і нацыянальнае вызваленне знайшла ў рамане П. Пестрака “Сустрэнемся на барыкадах”, які вытрымаў некалькі перавыданняў і быў перакладзены на рускую мову. У 1963 годзе выйшаў з друку  раман “Серадзібор”, прысвечаны праблемам жыцця пасляваеннай калгаснай вёскі, за які пісьменнік атрымаў Літаратурную прэмію імя Якуба Коласа.

Другі раздзел выстаўкі “Вера ў слова” прысвечаны перакладчыцкай дзейнасці П. Пестрака. Ён перакладаў на беларускую мову творы рускіх, украінскіх, польскіх, латышскіх, літоўскіх пісьменнікаў. Гэтыя пераклады і пераклады яго твораў на замежныя мовы экспануюцца на выстаўцы.

Дапаўняе экспазіцыю раздзел “Святло душы”, у якім прадстаўлены публікацыі з энцыклапедычных выданняў, кнігі і артыкулы аб жыцці і творчасці П. Пестрака. Пра яго пісалі М. Стральцоў, К. Хромчанка, М. Грынчык, С. Кухараў, У. Юрэвіч і інш.

Прадстаўленыя ў экспазіцыі кнігі можна заказаць праз электронны каталог Нацыянальнай бібліятэкі Беларусі.

Час работы выстаўкі адпавядае рэжыму работы бібліятэкі.
Уваход – па чытацкім білеце або білеце сацыякультурнага цэнтра.

Тэлефон для даведак: (8 017) 293 27 16.