Мелодыі жураўлінага краю

Юбілейная выстава “Мелодыі жураўлінага краю”, прысвечаная 75-годдзю з дня нараджэння беларускага кампазітара, дырыжора і педагога Генадзя Ермачэнкава (1948–2004), праходзіць з 9 лістапада па 27 снежня ў зале нотных і аўдыявізуальных дакументаў (пам. 305).

Творчая спадчына Генадзя Аляксандравіча шматгранная і ахоплівае розныя жанры: камерна-інструментальная музыка, канцэрты для трубы, трамбона, домры, балалайкі з аркестрам, вакальныя і харавыя сачыненні, сімфоніі і многае іншае. Стылю кампазітара ўласцівы ярка выражаны нацыянальны каларыт, незвычайная меладычнасць і лірызм. Яго музыка працята беларускімі інтанацыямі, у творчасці ён шматкратна звяртаўся да народных інструментаў, беларускай паэзіі, апяваў прыгажосць прыроды роднага краю.

Значнае месца ў музыцы Генадзя Ермачэнкава займаюць творы для цымбалаў – інструмента, які, па словах кампазітара, з’яўляецца сімвалам душы беларускага народа. Ён знайшоў новыя выразныя і выяўленчыя магчымасці цымбалаў і значна пашырыў рэпертуарныя рамкі цымбалістаў. Больш за 20 гадоў Генадзь Аляксандравіч быў кіраўніком вядомага ў нашай краіне і за яе межамі ансамбля беларускіх народных інструментаў “Ведрыца”.

На выставе прадстаўлены нотныя выданні твораў юбіляра: “Жураўліная песня” для змешанага ансамбля народных інструментаў і фартэпіяна, “Полесский перезвон” для валторны і фартэпіяна, карціна-фрэска для ансамбля цымбал і фартэпіяна “Край буслоў”, сюіта для ансамбля цымбал “З мінулага Нясвіжа” і інш.

Дапаўняюць выставу музычныя дыскі, а таксама артыкулы з перыядычных выданняў пра жыццё і творчасць кампазітара.

Тэлефон для даведак: (8 017) 293 27 52.