6 снежня ў беларускім павільёне Выставы дасягненняў народнай гаспадаркі (ВДНГ) у Маскве адкрыўся выставачны праект “Нацыянальная бібліятэка Беларусі: учора, сёння, заўтра”.
Экспазіцыя знаёміць расійскага гледача з адной з галоўных беларускіх славутасцей, найбуйнейшым інфармацыйным і сацыякультурным цэнтрам краіны, унікальным сховішчам нацыянальных дакументаў.
На выставе прадстаўлены архіўныя і сучасныя мастацкія фатаграфіі, сабраныя спецыяльна да стогадовага юбілею ўстановы.
Архіўныя рэтра-фатаграфіі – будынак бібліятэкі ў Юбілейным доме на Захар’еўскай вуліцы, каманда першых супрацоўнікаў з легендарным дырэктарам Іосіфам Бенцыянавічам Сіманоўскім, будынак бібліятэкі на вуліцы Чырвонаармейскай, адкрыты да яе дзесяцігадовага юбілею ў 1932 годзе, – вобразна ілюструюць мінулае стагоддзе яе дзейнасці, быццам гартаюць старонкі гісторыі.
Фатаграфіі сённяшняй бібліятэкі ў адпаведнасці з архітэктурным рашэннем адлюстроўваюць шматграннасць яе амплуа, каштоўнасць і святло ведаў, бясконцасць пазнавальнага свету. Святло льецца ў вокны, скрозь шкляныя столі і сцены бібліятэкі, зіхаціць у інтэр’ерах, успрымаецца ў адкрытай прасторы, паветры, вячэрняй падсветцы праз мастацкія фатаграфіі вядомых беларускіх фотамайстроў.
Працы дазваляюць убачыць мінулае, сучаснасць і будучыню Нацыянальнай бібліятэкі Беларусі скрозь прызму творчага ўяўлення аўтараў. Экспазіцыю дапаўняюць цікавыя факты, аформленыя з дапамогай qr-кодаў. Дзякуючы ім расійскі глядач мае магчымасць нестандартна зірнуць на бібліятэку і даведацца больш пра “беларускі алмаз”.
Азнаёміцца з выставай можна да канца студзеня 2023 года.
Матэрыял пададзены аддзелам сувязей з грамадскасцю.
