З 10 чэрвеня па 5 ліпеня ў аддзеле абслугоўвання афіцыйнымі дакументамі (2-гі паверх, пам. 207) адкрыта тэматычная кніжная выстаўка “Дапамога бежанцам: міжнародны і нацыянальны вопыт”, прысвечаная Сусветнаму дню бежанцаў.
Гэты Дзень быў заснаваны Генеральнай Асамблеяй ААН 4 снежня 2000 г. (рэзалюцыя 55/76) і штогод адзначаецца 20 чэрвеня, пачынаючы з 2001 г. Абвяшчэнне гэтага Дня – даніна павагі сіле духу і мужнасці мільёнаў людзей, якія пераадолелі неверагодныя цяжкасці, каб пачаць жыццё нанава і стаць паўнавартаснымі членамі грамадства ў складаных і нязвыклых абставінах.
Сусветны дзень бежанцаў – гэта магчымасць прыцягнуць увагу да мільёнаў уцекачоў ва ўсім свеце і да іх надзённых патрэб: ад забеспячэння вадой да наладжвання часовага прыстанішча. Зусім не важна, знаходзяцца гэтыя людзі ў аддаленых лагерах або жывуць па суседстве, – усім ім патрабуецца дапамога. Дапамога бежанцам пачынаецца з усведамлення таго, што яны пакінулі родныя дамы не па сваёй волі. У Канвенцыі аб статусе бежанцаў 1951 г. бежанец вызначаецца як асоба, якая знаходзіцца па-за краінай сваёй грамадзянскай прыналежнасці або звычайнага месца жыхарства ў сілу глыбокаабгрунтаванай боязі стаць ахвярай праследаванняў па прымеце расы, веравызнання, грамадзянства, прыналежнасці да пэўнай сацыяльнай групы або палітычных перакананняў.
Зараз у свеце зарэгістравана каля 20 мільёнаў бежанцаў і 25 мільёнаў унутрана перамешчаных асоб. Міжнародная супольнасць кансалідуе свае намаганні па палягчэнні цяжкай долі гэтых людзей. Створанае ў 1950 г. Упраўленне вярхоўнага камісара ААН па справах бежанцаў (УВКБ) у цяперашні час з’яўляецца цэнтральным міжнародным агенцтвам, якое прадпрымае намаганні для рашэння гэтай задачы. Яго найважнейшай функцыяй з’яўляецца наладжванне міжнароднай абароны і забеспячэнне павагі асноўных праў чалавека ў адносінах да бежанцаў, у тым ліку атрымання прыстанішча, а таксама недапушчэнне прымусовага вяртання нікога з іх у краіну, дзе яны маюць падставы баяцца рэпрэсій.
Рэспубліка Беларусь уносіць свой уклад у міжнародныя намаганні па рашэнні праблем бежанцаў. Наша краіна далучылася да Канвенцыі 1951 г. аб статусе бежанцаў і Пратаколу 1967 г., які датычыцца статусу бежанцаў, у маі 2001 г. Прадстаўніцтва УВКБ ААН у Беларусі было адкрыта ў 1995 г. Упраўленне вярхоўнага камісара ААН па справах бежанцаў штогод рэалізуе ў Беларусі праекты на суму каля 1 млн долараў ЗША, якія ў асноўным накіраваны на ўмацаванне нацыянальнай сістэмы сховішча. У перыяд 2009–2011 гг. УВКБ ААН ў Беларусі рэалізуюцца два праекты міжнароднай тэхнічнай дапамогі: “Павышэнне эфектыўнасці падзелу і работы з міграцыйнымі патокамі на дзяржаўнай граніцы і ўнутры Рэспублікі Беларусь” і “Мясцовая інтэграцыя бежанцаў у Беларусі”.
Прапанаваная тэматычная выстаўка пазнаёміць чытачоў з дзейнасцю міжнародных, няўрадавых і праваахоўных арганізацый, накіраванай на забеспячэнне абароны бежанцаў, іх адаптацыю і інтэграцыю ў краінах, якія далі прыстанішча. Прадстаўленыя на выстаўцы матэрыялы знаёмяць з літаратурай пра становішча бежанцаў, з дзейнасцю УВКБ ААН, а таксама з унутранай і знешняй палітыкай Рэспублікі Беларусь, накіраванай на аказанне дапамогі бежанцам у іх пошуку бяспечнага жыцця, міру і стабільнасці.
Выстаўка ўключае наступныя тэматычныя раздзелы:
- Становішча бежанцаў у свеце;
- Бежанцы ў сучасным міжнародным праве;
- Роля УВКБ ААН у абароне праў бежанцаў;
- Міжнароднае супрацоўніцтва і палітыка дапамогі бежанцам;
- Сістэма абароны бежанцаў у Рэспубліцы Беларусь.
Экспазіцыя налічвае каля 100 дакументаў: кнігі, брашуры, перыядычныя выданні, мімеаграфаваныя матэрыялы. Вялікую частку выстаўкі складаюць дакументы міжнародных арганізацый (ААН, ЮНЕСКА, Еўрапейскага саюза, Савета Еўропы) на рускай, французскай і англійскай мовах.
Выстаўка прызначана для палітолагаў, юрыстаў, сацыёлагаў, супрацоўнікаў органаў заканадаўчай і выканаўчай улады, навучальных і навуковых структур, а таксама для ўсіх, хто цікавіцца праблемамі бежанцаў і пытаннямі міграцыі і прыстанішча.
Карысныя спасылкі
Сістэма ААН
Аддзел па каардынацыі гуманітарных пытанняў
- Міжустаноўны аддзел па перамешчаных унутры краіны асобах
- Абарона цывільных асоб ва ўзброеным канфлікце
Вярхоўны Камісар ААН па правах чалавека
Міжустаноўны аддзел па перамешчаных унутры краіны асобах
Бліжнеўсходняе агенцтва ААН для дапамогі палясцінскім бежанцам і арганізацыі работ (БАПАР)
- Міжнародная абарона і дапамога бежанцам
- Гуманітарныя пытанні
- Гуманітарная дапамога
- Унутрана перемешчаныя асобы
- Абарона цывільных асоб ва ўзброеным канфлікце
- ААН працуе ў надзвычайных сітуацыях
- Бежанцы (Школьны кібераўтобус ААH)
Асноўныя дакументы
- Рэзалюцыя Генеральнай Асамблеі пра абвяшчэнне Дня (A/RES/55/76)
- Канвенцыя аб статусе бежанцаў (1951 год)
- Пратакол да Канвенцыі аб статусе бежанцаў (1967 год)
Дадатковыя дакументы