З 21 лістапада па 30 снежня ў зале нотных і аўдыявізуальных дакументаў (пам. 305) праходзіць выстаўка “Пра вечнае музыка раскажа”, прысвечаная 160-годдзю з дня нараджэння рускага кампазітара А.Д. Кастальскага.
Выдатны майстар харавога пісьма і знаўца харавой культуры, педагог і музыкант-асветнік Аляксандр Дзмітрыевіч Кастальскі (1856–1926) з’яўляўся разам з тым буйным, арыгінальным даследчыкам, чые работы азначалі новы этап у тэарэтычным вывучэнні рускай народнай песні.
Прырода надзяліла Аляксандра Дзмітрыевіча многімі талентамі. Ён пісаў вершы, займаўся акцёрскім майстэрствам, захапляўся жывапісам і фатаграфіяй. Аднак сур’ёзна ставіўся толькі да сваёй музычнай дзейнасці. Кампазітар з’яўляўся ключавой постаццю духоўна-музычнага адраджэння мяжы стагоддзяў. Яго царкоўныя кампазіцыі (Кастальскім напісана каля 130-ці хораў), а таксама сачыненні, што выраслі з царкоўна-пеўчых жанраў або роднасныя ім (манументальнае “Брацкае памінанне”, кантаты, музычныя дзействы і рэстаўрацыі), склалі найкаштоўнейшы пласт рускага мастацтва. Сярод твораў А. Кастальскага – оперы “Шэры воўк і Іван-царэвіч”, “Клара Міліч”, цыкл “З мінулых стагоддзяў”, хоры a cappella, музыка да драматычных спектакляў “Сценька Разін”, “Кароль Лір”, “Ганеле”, апрацоўкі рускіх народных песень.
Асноўную частку экспазіцыі складаюць нотныя выданні і аудыядакументы з фондаў Нацыянальнай бібліятэкі. Наведвальнікі маюць магчымасць праслухаць шэраг духоўных твораў аўтара ў выкананні мужчынскага хору Маскоўскага падвор’я Свята-Траецкай Сергіевай лаўры (“Хрыстос Уваскрос!”), хору Патрыяршага кафедральнага саборнага храма Хрыста Збавіцеля (“Велічанне Прасвятой Тройцы”), хору Мінскага духоўнага вучылішча (“Свеце ціхі”), хору Успенскага кафедральнага сабора Адэсы (трапар свята Праабражэння Гасподняга) і інш.
Дапаўняюць выстаўку кнігі і публікацыі з перыядычных выданняў, прысвечаныя жыццю і творчасці А.Д. Кастальскага, артыкулы і ўспаміны кампазітара, яго работа “Особенности народно-русской музыкальной системы” (1923).
Кантактны тэлефон: (8 017) 293 27 52.