З 13 кастрычніка па 25 лістапада 2008 года ў зале выяўленчых і відэадакументаў (пам. 307) адкрыта выстаўка “Вандроўнік, акрылены Богам”, прысвечаная 120-годдзю з дня нараджэння Язэпа Драздовіча (1888 –1954), – аднаго з самых яркіх прадстаўнікоў беларускага адраджэння пачатку XX ст.
У гісторыі беларускай культуры майстар вядомы як этнограф, фалькларыст, археолаг, пісьменнік, адзін з заснавальнікаў нацыянальнага гістарычнага жывапісу. Мастак таксама працаваў у графіцы, кніжнай ілюстрацыі, скульптуры, дэкаратыўна-прыкладным мастацтве.
За гады творчай дзейнасці ім былі створаны серыя графічных работ “Старажытная забудова ў Беларусі” і замалёўкі замкавай архітэктуры Беларусі, партрэты полацкіх і смаленскіх князёў. Майстар з’яўляецца заснавальнікам касмічнай тэмы ў беларускім выяўленчым мастацтве. Ён стварыў серыі жывапісных палотнаў “Жыццё на Марсе”, “Жыццё на Сатурне", “Жыццё на Месяцы”.
На выстаўке прадстаўлены альбомы, кнігі, артыкулы, паштоўкі і рэпрадукцыі работ славутага беларускага мастака.
Экспазіцыя разлічана на ўсе катэгорыі чытачоў, якія цікавяцца нацыянальнай культурай пачатку XX ст. і творчасцю Язэпа Драздовіча.
Кантактны тэлефон: 293-27-58.
 |
 |
 |
 |
 |
