27 лютага адбылося ўрачыстае адкрыццё фотавыстаўкі “5 гадоў – 5 візітаў” у рамках міжнароднай кампаніі “Па слядах Чавеса” ў гонар першай гадавіны з дня смерці прэзідэнта Баліварыянскай Рэспублікі Венесуэла.
Мерапрыемства арганізавана Нацыянальнай бібліятэкай Беларусі сумесна з Пасольствам Баліварыянскай Рэспублікі Венесуэла ў Рэспубліцы Беларусь.
На выстаўцы прадстаўлены фатаграфіі афіцыйных візітаў прэзідэнта Уга Чавеса ў Рэспубліку Беларусь. Арганізатары ставілі мэту ўшанаваць памяць Уга Чавеса і нагадаць аб яго візітах у Беларусь, пад час якіх камандантэ знаёміўся з беларускімі прадпрыемствамі, наведваў установы навукі і культуры.
Урачыстую цырымонію адкрыў дырэктар бібліятэкі Раман Сцяпанавіч Матульскі. Ён таксама адзначыў, што бібліятэка і пасольства Венесуэлы супрацоўнічаюць даўно і плённа. Нацыянальная бібліятэка – гэта пляцоўка, на якой праводзіўся цэлы шэраг сумесных мерапрыемстваў: кніжныя і мастацкія выстаўкі, цырымоніі дарэння кніг і іншыя.
Надзвычайны і Паўнамоцны Пасол Баліварыянскай Рэспублікі Венесуэла ў Рэспубліцы Беларусь Амерыка Дыяс Нуньес падзякаваў Раману Сцяпанавічу Матульскаму за магчымасць правесці гэтае мерапрыемства ў сценах бібліятэкі і падкрэсліў, што прадстаўленыя фотаработы не толькі апісваюць вызначаныя падзеі, але і адлюстроўваюць дух таго часу.
У рамках адкрыцця фотавыстаўкі былі падведзены вынікі конкурсу дзіцячых малюнкаў на тэму “Чавес у Беларусі”, у якім прымалі ўдзел вучні 4-х і 7-х класаў беларускіх школ з паглыбленым вывучэннем іспанскай мовы. Былі вызначаны 22 лепшыя работы. Ва ўрачыстай атмасферы пасол уручыў граматы і падарункі пераможцам.
Сапраўдным падарункам для прысутных стаў незвычайны танец “Венесуэла” ў выкананні танцавальнага калектыву “Ёланда Марэна” Культурнага цэнтра імя Сімона Балівара пры пасольстве.
Азнаёміцца з фотавыстаўкай наведвальнікі могуць у галерэі “Ракурс” (2-гі паверх) на працягу месяца.
 |
 |
 |
 |
 |
 |
 |
 |
 |
 |
 |
 |
