18 мая ў галерэі “Ракурс” (2-гі паверх) адбылося адкрыццё выставы жывапісу “Любімыя” Серафімы Патапавай.
Серафіма Патапава (1945–2019) – мастачка-станкавістка, дэкаратар, жывапісец, заснавальніца і кіраўнік унікальнай майстэрні “Мастакі, якія танцуюць”.
Улюбёныя тэмы Серафімы Аляксандраўны – Чарлі Чаплін, русалкі, анімалістычныя вобразы (каменны леў, рыбы, груганы, матылі), завялыя кветкі, анёлы, пейзажы з падарожжаў, партрэты дарагіх ёй людзей. Усе гэтыя вобразы доўга жылі на палотнах мастачкі, здзіўляючы сваёй інтэрпрэтацыяй. Варыятыўнасць любімых персанажаў, сюжэтаў, кампазіцый уяўляе новыя абліччы персанажаў, багатую нюансамі палітру настрояў.
Серафіма Аляксандраўна па паходжанні, ментальнасці і светаадчуванні была абсалютнай гараджанкай. Таму, верагодна, яе душа і пэндзаль так апантана імкнуліся да жывой прыроды. Як вынік, пейзажы яе напоўненыя паветрам, напоеным вільгаццю, зелянінай лісця, блакітам возера і малаком туману.
У адкрыцці выставы ўзялі ўдзел намеснік генеральнага дырэктара Нацыянальнай бібліятэкі Беларусі Віктар Пшыбытка, выкладчык мінскай студыі “Мастакі, якія танцуюць”, вучаніца Серафімы Патапавай Наталля Нялецкая, муж Серафімы Патапавай Уладзімір Патапаў.
Цёплую атмасферу вечара стварылі песенныя кампазіцыі пад гітару ў выкананні літаратара, аўтара кнігі “Откуда берутся снежные барсы” Сяргея Філімонава.
Куратар выставы – мастацтвазнаўца Ларыса Фінкельштэйн, заснавальніца першай беларускай галерэі “БРАМА”, член Беларускага саюза дызайнераў, Беларускага саюза крытыкаў, Беларускага саюза мастакоў, Міжнароднай асацыяцыі мастацтвазнаўцаў АІС (Масква).
Экспазіцыя будзе працаваць да 3 снежня 2023 года.
Дата яе заканчэння можа быць зменена.
Час работы выстаўкі адпавядае рэжыму работы бібліятэкі.
Уваход – па чытацкім білеце або білеце сацыякультурнага цэнтра.
Тэлефон для даведак: (8 017) 368 37 37.
Матэрыял пададзены аддзелам галерэйна-выставачнай дзейнасці.