22 жніўня ў бібліятэцы адкрыецца фотавыстаўка Анатоля Дрыбаса “Мой Мінск”, прысвечаная 950-годдзю беларускай сталіцы.
Адчуваць жыццё города, яго шум і спакой, назіраць ранішнюю мітусню і вячэрнюю рамантыку… І ўсё гэта − праз фотааб’ектыў. А далей − на фотапаперу. Так нараджаюцца фотаработы ўлюбёных у свой горад мастакоў.
Адным з іх, бясспрэчна, з’яўляецца славуты беларускі фатограф, член фотаклуба “Мінск” і аб’яднання “Фотамастацтва” Анатоль Дрыбас. За плячыма майстра − 35 гадоў прафесійнага вопыту, праца ў выдавецтве “Беларуская энцыклапедыя імя Петруся Броўкі” і безліч фотаальбомаў, прысвечаных помнікам культуры Беларусі, яе маляўнічым мясцінам і прыродзе. Аднак сталіца ў творчасці Анатоля Дрыбаса займае асобнае месца. Толькі за апошнія некалькі гадоў былі створаны шэсць фотаальбомаў, прысвечаных гораду: “Мінск”, “Мінск – сэрца Беларусі”, “Вячэрні Мінск” і іншыя.
Юбілейная экспазіцыя ўключае каля 50 фотаздымкаў аўтара, выкананых за апошнія некалькі гадоў. Запрашаем здейсніць імправізаваны шпацыр па Мінску, паназіраць, як з часам горад змяняўся − новыя будынкі, музеі, паркі, атракцыёны, выставачныя комплексы, станцыі метрапалітэна. Не выключана, што вас ахопіць настальгія па Мінску, які быў раней, а магчыма, вы з захапленнем адзначыце перамены ў жыцці сталіцы. Бо, як кажуць, колькі людзей – столькі меркаванняў.
Да канца 2017 года аўтар плануе надрукаваць яшчэ тры альбомы, прысвечаных Мінску. А пакуль запрашаем пабачыць горад праз фотааб’ектыў Анатоля Дрыбаса − улюбёнага ў сталіцу фотамастака.
Выстаўка адкрыецца ў галерэі “Атрыум” (3-і паверх) і працягнецца да 9 кастрычніка 2017 года.
Дата заканчэння работы выстаўкі можа быць зменена.
Тэлефон для даведак: (+375 17) 266 37 37, 293 28 23, 293 28 81.
Е-mail: pr@nlb.by
