29 красавіка ў бібліятэцы прайшла цырымонія адкрыцця выстаўкі і ўзнагароджання пераможцаў VII Міжнароднага дзіцяча-юнацкага конкурсу выяўленчага мастацтва “КрасаWееk”.
Урачыстая музыка, яркія фарбы, усмешкі і ажыўленыя размовы – міжнародны праект “КрасаWeek” сабраў маладых і таленавітых у Нацыянальнай бібліятэцы, каб падвесці вынікі і адзначыць лепшых!
Мінскі дзяржаўны мастацкі каледж імя А.К. Глебава ўжо сёмы раз праводзіць конкурс з мэтай падтрымкі юных талентаў і дапамогі ім у раскрыцці творчых здольнасцей. За гэтыя гады пашырылася не толькі геаграфія, але і значна павялічылася колькасць ўдзельнікаў конкурсу: у аргкамітэт было даслана каля 500 творчых работ з розных куткоў свету – Беларусі, Расіі, Украіны, Польшчы, Чэхіі, Славеніі, Малдовы, Балгарыі і Латвіі. Сімвалічна, што сёлета, акрамя вольнай тэматыкі, удзельнікі прадставілі работы на тэму “Спадчына Францыска Скарыны”.
Першы намеснік дырэктара па абслугоўванні карыстальнікаў і ідэалогіі Нацыянальнай бібліятэкі Беларусі Алена Далгаполава адзначыла: “Вельмі прыемна, што Мінскі дзяржаўны мастацкі каледж імя А.К. Глебава далучыўся да святкавання 500-годдзя беларускага кнігадрукавання, вылучыўшы гэтую тэму ў рамках конкурсу, і гэтая знамянальная дата знайшла адлюстраванне ў работах юных майстроў”. Яна таксама павіншавала ўдзельнікаў і пераможцаў конкурсу і падзякавала за цеснае супрацоўніцтва, якое не абмяжоўваецца арганізацыяй выставак, а знаходзіць новыя грані і магчымасці.
Падчас урачыстай цырымоніі ўзнагароды знайшлі сваіх пераможцаў у чатырох намінацыях па трох узроставых групах – “Жывапіс”, “Графіка”, “Дэкаратыўна-прыкладное мастацтва” і “Скульптура”. Гран-пры конкурсу “КрасаWeek” – у Саладухі Жанны, навучэнкі Дзіцячай школы выяўленчых мастацтваў г. Брэста. Дыпломамі і прызамі адзначылі не толькі пераможцаў і лаўрэатаў. За адказную працу ў ацэнцы здольнасцей юных талентаў былі ўручаны падзякі ўсім членам журы і граматы выкладчыкам за паспяховую творчую працу з навучэнцамі пры падрыхтоўцы да конкурсу.
У мерапрыемстве прынялі ўдзел Надзвычайны і Паўнамоцны Пасол Чэшскай Рэспублікі ў Рэспубліцы Беларусь Мілан Экерт, дырэктар Мінскага дзяржаўнага мастацкага каледжа імя А.К. Глебава Аляксандр Шантаровіч, старшыня Беларускага саюза мастакоў Рыгор Сітніца.
Лепшыя конкурсныя работы будуць прадстаўлены ў галерэі “Лабірынт” (3-ці паверх) да 11 мая 2017 года.
Дата заканчэння работы выстаўкі можа быць зменена.
Тэлефоны для даведак: (8 017) 293 28 33, 266 37 37, 293 27 56.
Е-mail: pr@nlb.by
 |
 |
 |
 |
 |
 |
|
|
|
|
 |
 |
 |
