13 лістапада ў галерэі “Атрыум” (3-ці паверх) адкрылася выстаўка “Крама з цытатамі”.
Арганізатарамі сталі Польскі інстытут у Мінску, Нацыянальная бібліятэка Беларусі і праект “Крама з цытатамі” (Познань, Польшча).
Наведвальнікаў выстаўкі чакаюць 30 цытат вядомых палякаў у графічным афармленні. Аўтар ідэі дызайнер Дар'я Мельцажэвіч стварае партрэты асоб, якія ўнеслі ўклад у культуру і мастацтва. Выявы, дапоўненыя цытатамі, кароткімі і ёмістымі, інтрыгуюць і пераконваюць чытача пазнаёміцца з творчасцю іх аўтараў.
Першапачаткова прынты друкавалі на футболках і сумках і прадавалі праз інтэрнэт. Пазней “Крама з цытатамі” матэрыялізавалася ў горадзе Познань – на адкрыцці выстаўкі прэзентавалі частку сувенірнай прадукцыі польскай крамы.
Мастацкую экспазіцыю дапоўніла выстаўка кніг з фонду Нацыянальнай бібліятэкі Беларусі – творы прадстаўленых польскіх аўтараў можна ўбачыць як у арыгінале, так і ў перакладзе на беларускую або рускую мовы.
Дырэктар Нацыянальнай бібліятэкі Беларусі Раман Матульскі адзначыў важнасць культурнага ўзаемадзеяння паміж краінамі і павіншаваў гасцей з Польшчы са 100-годдзем незалежнасці.
Дырэктар Польскага інстытута ў Мінску Цэзары Карпіньскі падзякаваў Нацыянальнай бібліятэцы за шматгадовае супрацоўніцтва і нагадаў пра фестываль “Месяц польскай культуры”, арганізаваны сумесна з беларускімі партнёрамі. На працягу лістапада ў сталіцы пройдзе шэраг рознафарматных мерапрыемстваў – прэзентацыі кніг, сустрэчы з польскімі пісьменнікамі і іх беларускімі перакладчыкамі, літаратурна-музычны праект і ў тым ліку літаратурна-мастацкая выстаўка “Крама з цытатамі”.
Дызайнер Дар'я Мельцажэвіч удакладніла, што мэта праекта "Крама з цытатамі" – наблізіць людзей да міру культуры і мастацтва, а таксама прыцягнуць да чытання добрай літаратуры.
Выстаўка будзе доўжыцца да 4 лютага 2019 года.
Дата яе завяршэння можа быць зменена.
З 27 лістапада экспазіцыя размешчана ў галерэі “Ракурс” (2-гі паверх).
Час работы выстаўкі адпавядае рэжыму работы бібліятэкі.
Уваход – па чытацкім білеце ці білеце сацыякультурнага цэнтра.
Тэлефоны для даведак: (8 017) 293 28 33, 293 28 81.
Е-mail: pr@nlb.by
