27 мая з нагоды адкрыцця выстаўкі “Italiae. Ад братоў Алінары да майстроў сучаснай фатаграфіі” прайшоў прадпрагляд экспазіцыі з удзелам Надзвычайнага і Паўнамоцнага Пасла Італьянскай Рэспублікі ў Рэспубліцы Беларусь Марыо Бальдзі і генеральнага дырэктара Нацыянальнай бібліятэкі Беларусі Рамана Матульскага.
Раман Сцяпанавіч расказаў гасцям, што бібліятэку з Італьянскай Рэспублікай звязвае шматгадовае сяброўства, пацвярджэннем якога з’яўляюцца ўзаемныя візіты і сумесныя праекты, а таксама падкрэсліў: “Кожны праект Рэспублікі Італія адрозніваецца высокім эстэтычным і мастацкім узроўнем і выклікае вялікую зацікаўленасць беларускай грамадскасці. Сёння мы з дапытлівасцю вандроўніка чакаем новага знаёмства з сонечнай краінай праз прызму гістарычных і сучасных фотаздымкаў”.
“Я шчаслівы прадставіць беларускай публіцы выстаўку, – сказаў Марыа Бальдзі, – і я ганаруся тым, што раблю гэта напярэдадні святкавання Дня Італьянскай Рэспублікі!” Спадар пасол расказаў прысутным аб праекце і заўважыў, што выстаўка пачынае сваё падарожжа з Мінска, потым адправіцца ў Санкт-Пецярбург і іншыя дыпламатычныя прадстаўніцтвы Італіі”.
Трэба адзначыць, што фонды беларускага “алмаза ведаў” налічваюць каля 5 тысяч выданняў на італьянскай мове. У бібліятэцы таксама захоўваецца каля 400 старадрукаў, выдадзеных у Італіі пачынаючы з 1475 і па 1800 год.
Спецыяльна да адкрыцця фотавыстаўкі ў музеі кнігі былі выстаўлены каштоўныя выданні з фондаў бібліятэкі: рарытэт “Боская камедыя” Дантэ Аліг’еры, першая кніга, надрукаваная Нікола дэ Ларэнца ў родным горадзе паэта ў 1481 г., і адно з самых ранніх выданняў з гравюрамі на метале, а таксама падарунак Італіі Ныцыянальнай бібліятэцы – факсіміле рукапісу самага старажытнага на сённяшні дзень манускрыпта “Боская камедыя” Дантэ Аліг’еры, вядомага як "Manoscritto Palatino 313", арыгінал якога захоўваецца ў Нацыянальнай цэнтральнай бібліятэцы Фларэнцыі.
Выстаўка “Italiae. Ад братоў Алінары да майстроў сучаснай фатаграфіі” – гэта 126 фотаздымкаў 75 фатографаў, якія занялі сваё месца ў галерэях бібліятэкі і расказваюць гледачам аб прыгажосці і разнастайнасці Італіі, яе краявідах, крэатыўнасці і людзях. А назва выстаўкі “Italiae” (Італіі) – наўмысна ў множным ліку – прадстаўляе нагляднае сведчанне таго, як адбывалася эвалюцыя, і падкрэслівае шматлікасць гэтай краіны, разнастайнай, складанай, адначасова старажытнай і заўсёды актуальнай, напоўненай традыцыямі і інавацыямі, з моцнай рэгіянальнай ідэнтычнасцю ад поўначы да поўдня.
Экспазіцыю складаюць тры часткі: “Краявіды”, “Праца”, “Асобы” – фатаграфіі з атэлье, хроніка і мастацкае фота розных стыляў. Гэта цікавы шлях, які пачынаецца з братоў Алінары і вялізнага свету вакол іх, уключае розныя калекцыі і архівы, каб праз вялікіх майстроў фатаграфіі ХХ і ХХІ стагоддзяў прыйсці да самых сучасных эксперыментаў.
Выстаўка “Italiae. Ад братоў Алінары да майстроў сучаснай фатаграфіі” дапамагае прасачыць за пераўтварэннямі ў краіне на мове, здольнай адлюстраваць геаграфічную разнастайнасць, даследаваць глыбіні гісторыі і адначасова патрапіць у таямніцы гэтых мясцін, якія пераўтвараюць многія Італіі ў адзіную Італію…
Запрашаем усіх жадаючых атрымаць асалоду ад фотаздымкаў сонечнай краіны!
Выстаўка працуе да 27 чэрвеня 2021 г. у галерэях “Атрыум” і “Лабірынт” (3-ці паверх).
Дата яе заканчэння можа быць зменена.
Уваход – па чытацкім білеце або білеце сацыякультурнага цэнтра.
Матэрыял пададзены аддзелам сувязей з грамадскасцю.
