26 снежня ў бібліятэцы адбылася ўрачыстая цырымонія перадачы ў дар “алмазу ведаў” калекцыі са 100 кніг, прадстаўленай Нацыянальнай бібліятэкай пры Адміністрацыі Прэзідэнта Турэцкай Рэспублікі і Пасольствам Турэцкай Рэспублікі ў Рэспубліцы Беларусь.
Колькасць кніг сімвалічная: у 2023 годзе Турцыя адзначае 100-годдзе з дня абвяшчэння Турэцкай Рэспублікі. У калекцыі – творы, якія прадстаўляюць культурныя і мастацкія каштоўнасці, рэгіянальныя традыцыі, гісторыю, прыроду і антычныя рэгіёны Турцыі. Акрамя таго, у падборцы прысутнічаюць творы турэцкай літаратуры, даследаванні, прысвечаныя турэцкай мове, а таксама слоўнікі.
Кнігі будуць цікавыя тым, хто вывучае турэцкую мову, а таксама ўсім, хто цікавіцца культурай, гісторыяй і славутасцямі Турцыі.
Ва ўрачыстай цырымоніі ўзялі ўдзел Надзвычайны і Паўнамоцны Пасол Турэцкай Рэспублікі ў Рэспубліцы Беларусь Мустафа Азджан і генеральны дырэктар Нацыянальнай бібліятэкі Беларусі Вадзім Гігін, а таксама супрацоўнікі бібліятэкі і дыпламатычнага прадстаўніцтва Турэцкай Рэспублікі ў Рэспубліцы Беларусь.
У прамове спадар Азджан распавёў пра праект “Бібліятэкі кніг свету”, які рэалізуецца Нацыянальнай бібліятэкай пры Адміністрацыі Прэзідэнта Турэцкай Рэспублікі. У рамках праекта ў Прэзідэнцкай бібліятэцы Турцыі прадстаўлены раздзелы з кнігамі 110 краін свету, уключаючы літаратуру, перададзеную Нацыянальнай бібліятэкай Беларусі ў рамках праекта “Беларусь сёння”.
Вадзім Гігін адзначыў значнасць дадзенага мерапрыемства для абедзвюх краін, паколькі культурны дыялог – гэта тое, што дазваляе лепш пазнаць адзін аднаго і ўмацаваць супрацоўніцтва.
У рамках мерапрыемства была арганізавана выстава-прагляд каштоўных усходніх (турэцкіх) рукапісаў XVI–XIX стст. з фонду Нацыянальнай бібліятэкі Беларусі. Манускрыпты паступілі з калекцыі вядомага военачальніка і дзяржаўнага дзеяча графа Івана Фёдаравіча Паскевіча (1782–1856).
Матэрыял пададзены аддзелам сувязей з грамадскасцю.