21 чэрвеня 1741 г., роўна 280 гадоў таму, нарадзіўся сусветна вядомы французскі вучоны, батанік, лекар і педагог Жан Эмануэль Жылібер. Навуковая дзейнасць знакамітага натураліста была цесна звязана з тэрыторыяй сучаснай Беларусі. Менавіта ён стаў заснавальнікам “Цэнтра медыцынскай адукацыі і медыка-біялагічных навук” у Гродна і аўтарам навуковай кнігі “Флора Літвы”.
З нагоды юбілейнай даты знакамітага вучонага вялікі інтарэс выклікае адна з яго першых друкаваных прац па даследаванні расліннага свету Гродзеншчыны і яе ваколіц – “Флора Літвы”, якая захоўваецца ў фондзе Нацыянальнай бібліятэкі Беларусі.
Лацінская назва кнігі: Flora Lituanica inchoata, seu enumeratio plantarum quas circa Grodnam collegit et determinavit Joannes, Emanuel, Gilibert. Facul. Monspel. Med. Doct. Coll: Reg: Med: Lugdunei Professor Aggregatus, Regis Poloniae Consiliarius, nec non Medicus Ordinarius M. D. Lit. Physicus. Collectio I, II. – Grodnae, typis S. R. M., 1781.
“Флора Літвы” пабачыла свет як пяцітомнае выданне на лацінскай мове. Першыя два тамы былі выдадзены ў Гродна ў 1781 г., наступныя – у Вільні: трэці (1781) і два апошнія тамы, чацвёрты і пяты (1782).
Кніга з фонду НББ уяўляе сабой канвалют – асобнік, у якім аб’яднаны першы і другі том у адным пераплёце. Кожны з двух тамоў выдаваўся як самастойная кніга з асобным тытульным аркушам, тамы былі змешчаны ў адзін пераплёт пазней, верагодна, у пачатку XIX ст. Згодна з правененцыямі, канвалют належаў Магілёўскаму езуіцкаму калегіуму і Магілёўскай мужчынскай гімназіі.
Праца “Флора Літвы” Жана Эмануэля Жылібера – гэта навуковая спадчына, у якой утрымліваюцца вынікі даследавання флоры Беларусі. Да яе звярталася не адно пакаленне батанікаў Віленскага ўніверсітэта і іншых еўрапейскіх універсітэтаў. Цікавасць да яе не згасае і па сённяшні дзень.
Матэрыял падрыхтаваны навукова-даследчым аддзелам кнігазнаўства.
