21 сакавіка ў Нацыянальнай бібліятэцы Беларусі адбылася дыялогавая пляцоўка з удзелам міністра культуры Рэспублікі Беларусь Анатоля Маркевіча, прадстаўнікоў дзяржаўных структур і грамадскіх аб’яднанняў беларусаў замежжа.
Удзел ўзялі Анатоль Маркевіч, саветнік галоўнага ўпраўлення шматбаковай дыпламатыі Міністэрства замежных спраў Рэспублікі Беларусь Аляксей Крывальцэвіч, загадчык сектара па справах нацыянальнасцей апарата Упаўнаважанага па справах рэлігій і нацыянальнасцей Алена Бязручка, кіраўнікі і прадстаўнікі грамадскіх аб’яднанняў беларусаў замежжа з Рэспублікі Арменія, Рэспублікі Казахстан, Латвійскай Рэспублікі, Эстонскай Рэспублікі, Рэспублікі Узбекістан, Рэспублікі Башкартастан, Рэспублікі Карэлія і многіх гарадоў Расійскай Федэрацыі.
Беларусы замежжа падзяліліся інфармацыяй аб дзейнасці па захаванні і папулярызацыі беларускай культуры, гісторыі, мовы за межамі Беларусі.
У рамках мерапрыемства Анатоль Маркевіч уручыў памятны сувенір прадстаўніку беларусаў Карэліі Мірону Перхіну, які ў лісце да Дзеда Мароза напісаў, што вельмі хоча пабываць у Беларусі, дзе ніколі яшчэ не быў, а толькі чуў велізарную колькасць апавяданняў аб нашай цудоўнай краіне ад сваёй вельмі актыўнай і да глыбіні душы ўлюбёнай у Беларусь бабулі – старшыні грамадскага аб’яднання беларусаў Карэліі Святланы Барташэвіч.
Па выніках дзейнасці грамадскіх аб’яднанняў беларусаў замежжа Анатоль Маркевіч узнагародзіў граматамі Міністэрства культуры Рэспублікі Беларусь кіраўнікоў беларускай дыяспары за шматгадовую працу і вялікі асабісты ўклад у захаванне, развіццё і папулярызацыю беларускай культуры ў краіне пражывання.
Матэрыял пададзены аддзелам сувязей з грамадскасцю.