3–4 верасня Нацыянальная бібліятэка Беларусі возьме ўдзел у святкаванні XXIX Дня беларускага пісьменства. Сёлета свята прыме вядомы з XVI стагоддзя горад Добруш, у якім былі заснаваны першыя ў Беларусі папяровая фабрыка і фарфоравы завод, а знакамітым ураджэнцам Добрушскага краю з’яўляецца класік нацыянальнай літаратуры – пісьменнік, сцэнарыст і драматург Іван Шамякін.
У свой юбілейны год Нацыянальная бібліятэка падрыхтавала экспазіцыю “Кніжнае стагоддзе”, прымеркаваную да 100-годдзя Нацыянальнай бібліятэкі Беларусі, Года гістарычнай памяці і Дня беларускага пісьменства. Сярод экспанатаў – першы статут установы (1926), першы пуцяводнік (1969), першы зводны рэтраспектыўны каталог друкаванай кнігі “Кніга Беларусі” (1986), матэрыялы Першых кнігазнаўчых чытанняў (2000).
Паглыбіць свае веды пра гісторыю роднай краіны можна будзе на прэзентацыях электронных інфармацыйных рэсурсаў (ЭІР) праз каштоўны і разнастайны збор дакументаў – ЭІР “Гісторыя бібліятэчнай справы Беларусі” (калекцыі “Бібліятэчная справа Беларусі ў дакументах і матэрыялах” і “Бібліятэчная справа Беларусі ў асобах”) і ЭІР “Гомельшчына ў рэсурсах Нацыянальнай бібліятэкі Беларусі”.
Спецыяльна для гасцей Нацыянальная бібліятэка Беларусі арганізуе інтэрактыўную прастору, дзе любы наведвальнік атрымае магчымасць асабіста дакрануцца да факсімільных выданняў знакавых узораў айчыннай кніжнай культуры, стаць удзельнікам тэматычнай віктарыны “Загадкі кніжнай скарбніцы”, павіншаваць бібліятэку і пакінуць свае пажаданні і нават сабраць пазл! Кожны ўдзельнік, які паспяхова адкажа на пытанні, зможа зрабіць памятны запіс у Кнізе пераможцаў, а першыя 100 пераможцаў атрымаюць памятныя сувеніры.
Дзень беларускага пісьменства штогод святкуецца ў нашай краіне ў першую нядзелю верасня і традыцыйна праводзіцца ў гарадах – цэнтрах асветы, культуры і кнігадрукавання, месцах з багатай гістарычнай спадчынай, з якімі непарыўна звязаны жыццё і творчасць славутых дзеячаў Беларусі розных часоў.
Месца правядзення: г. Добруш, сквер на пр. Міра.
Чакаем вас!
Матэрыял пададзены аддзелам сувязей з грамадскасцю.