Даведацца пра навіны Гродзенскай губерні, асноўныя кірункі жыцця гарадзенцаў у ХІХ ст., атрымаць карысныя парады і знайсці неабходныя аб’явы можна было ў газеце “Гродненские губернские ведомости”.
У зборах Беларусі амаль не захавалася асобнікаў гэтай крыніцы ведаў па гісторыі рэгіёна. Нацыянальнай бібліятэцы пашчасціла папоўніць свой фонд 64-ма адзінкамі 1840-х гг.
“Гродненские губернские ведомости” – урадавая газета, якая выдавалася ў губернскай друкарні на працягу 1838–1915 гг. У 1840-х друкавалася на паперы ручной вытворчасці без вадзянога знака. Варта адзначыць, што памер газеты быў невялікі ў параўнанні з сучаснымі перыядычнымі выданнямі. На першым аркушы ўсіх нумароў быў размешчаны герб губерні.
У афіцыйнай урадавай газеце публікаваліся дзяржаўныя дакументы, а таксама матэрыялы мясцовых улад. Асаблівую цікавасць уяўляе неафіцыйная частка, якая ўключае разнастайныя матэрыялы па гісторыі краю, яго этнаграфіі, археалогіі, краязнаўстве, медыцыне, асвеце, гандлі, сельскай гаспадарцы, прамысловасці і інш. Таксама ў выданні друкаваліся творы мастацкай літаратуры і вуснай народнай творчасці. Як і сёння, размяшчаліся парады, прыватныя аб’явы і рэклама.
Нумары газеты змяшчаюць імёны і прозвішчы жыхароў губерні, што можа стаць запатрабаванай інфармацыяй для даследчыкаў генеалогіі.
“Гродненские губернские ведомости” – каштоўны нацыянальны дакумент, які можа стаць аб’ектам даследаванняў для філолагаў, гісторыкаў, рэлігіязнаўцаў, культуролагаў і ўсіх зацікаўленых гісторыяй роднага краю.
Матэрыял пададзены навукова-даследчым аддзелам кнігазнаўства.