21 сакавіка ў бібліятэцы адбыўся семінар “Інфармацыйныя рэсурсы выдавецтва Оксфардскага ўніверсітэта для навуковых даследаванняў і вышэйшай адукацыі”.
Арганізатарамі семінара выступілі Нацыянальная бібліятэка Беларусі і выдавецтва “Oxford University Press”.
Семінар адкрыла намеснік дырэктара Нацыянальнай бібліятэкі Беларусі па інфармацыйных рэсурсах Таццяна Кузьмініч.
Рэгіянальны менеджар выдавецтва Оксфардскага ўніверсітэта ў СНД Марцін Дамбоўскі прадставіў удзельнікам навуковыя інфармацыйныя рэсурсы выдавецтва, а таксама магчымасці працы з імі на ўнікальнай выдавецкай платформе.
Для беларускіх навукоўцаў быў праведзены трэнінг па размяшчэнні публікацый у рэйтынгавых замежных часопісах. Былі падрабязна разгледжаны пытанні:
- выбар часопіса для публікацыі;
- крытэрыі якасці навуковага артыкула;
- тэхнічныя, змястоўныя і стылістычныя патрабаванні да навуковага артыкула;
- рэдакцыйны працэс, тэрміны разгляду і размяшчэння публікацый;
- прычыны адхілення навуковых артыкулаў;
- суаўтарства пры напісанні навуковых артыкулаў.
У семінары прынялі ўдзел больш за 90 слухачоў: прадстаўнікі прафесарска-выкладчыцкага складу вядучых ВНУ, дактаранты, аспіранты і магістранты, кіраўнікі і спецыялісты бібліятэк і інфармацыйных цэнтраў, прадстаўнікі беларускіх выдавецтваў.
Доступ да навуковых часопісаў выдавецтва Оксфардскага ўніверсітэта адкрыты для карыстальнікаў Нацыянальнай бібліятэкі Беларусі.