25 чэрвеня ў бібліятэцы прайшла прэзентацыя выдання "Канстытуцыя Піліпа Орліка".
Беларускім грамадскім аб'яднаннем украінцаў "Ватра” быў перакладзены на беларускую мову гістарычны дакумент “Дагаворы і пастановы правоў і вольнасцяў вайсковых" 1710 года, вядомы як "Канстытуцыя Піліпа Орліка". Гэты помнік палітыка-прававой думкі лічыцца першай украінскай канстытуцыяй. Выданне дакумента на беларускай мове сімвалічна верне на радзіму імя яго аўтара: украінскі дзяржаўны і палітычны дзеяч Піліп Орлік – ураджэнец вёскі Касута (Мінская вобласць).
У прэзентацыі ўзялі ўдзел намеснік міністра інфармацыі Рэспублікі Беларусь Ігар Бузоўскі, Надзвычайны і Паўнамоцны Пасол Украіны ў Рэспубліцы Беларусь Ігар Кізім, Надзвычайны і Паўнамоцны Пасол Каралеўства Швецыя ў Рэспубліцы Беларусь Крысціна Юханесан, Надзвычайны і Паўнамоцны Пасол Рэспублікі Малдова ў Рэспубліцы Беларусь Віктар Сарачан, генеральны дырэктар Нацыянальнай бібліятэкі Беларусі Раман Матульскі, намеснік генеральнага дырэктара Нацыянальнай бібліятэкі Беларусі Алесь Суша, старшыня Мінскага гарадскога грамадскага аб'яднання ўкраінцаў "Заповіт" Галіна Калюжная, дырэктар Інстытута гісторыі НАН Беларусі Вячаслаў Даніловіч.
Выданне "Канстытуцыі Піліпа Орліка" папоўніла фонд Нацыянальнай бібліятэкі Беларусі. Дзякуючы шведскаму паслу Крысціне Юханесан ў фондзе бібліятэкі зараз можна знайсці і копію лацінамоўнай версіі дакумента “Дагаворы і пастановы правоў і вольнасцяў вайсковых”, арыгінал якой захоўваецца на радзіме пасла. Падарункам у адказ стаў фотаальбом “Раритеты Национальной библиотеки Беларуси”, у якім адлюстраваны галоўныя скарбы “алмаза ведаў”.
У завяршэнне мерапрыемства для гасцей правялі экскурсію па выставе “Вялікая Перамога”, прысвечанай 75-годдзю Перамогі ў Вялікай Айчыннай вайне.
Матэрыял пададзены аддзелам сувязей з грамадскасцю.
Чытайце таксама: Багуслаў Радзівіл – герой папулярнага гістарычнага рамана