26 лютага ў галерэі “Лабірынт” адбылася лекцыя-канцэрт “Зайграй жа мне, дударочку, а я патанцую” з цыкла “Нацыянальная музычная спадчына Беларусі”.
Кіраўнік харавой капэлы Галіна Цмыг расказала аб нацыянальных песенных традыцыях Беларусі, аб той важнай працы, якую праводзяць супрацоўнікі Цэнтра даследаванняў беларускай культуры, мовы і літаратуры НАН Беларусі па захаванні і папулярызацыі нацыянальнай музычнай спадчыны.
У выкананні музыкантаў прагучалі ўзоры песеннай народнай творчасці і апрацоўкі народных песень, створаныя вядомым беларускім кампазітарам Аленай Атрашкевіч.
Акрамя таго, слухачоў чакала дзіўнае знаёмства з беларускімі нацыянальнымі музычнымі інструментамі: дудой, жалейкай, акарынай, гуслямі, колавай лірай. Аб іх будове, прынцыпах гуказдабывання і прымяненні ў народнай традыцыі распавяла супрацоўнік цэнтра Кацярына Радзівілава.
Прысутныя змаглі не толькі атрымаць асалоду ад цудоўнага выступлення артыстаў, але і выканаць некаторыя творы разам з імі, а таксама развучыць беларускі танец “Матлёт”.
Чакаем усіх жадаючых на наступным канцэрце “Ад прадзедаў спакон вякоў мне засталася спадчына”, у якім прагучыць музыка беларускіх кампазітараў на вершы нацыянальных паэтаў. Сустрэча адбудзецца 23 лютага ў 18.30.
Тэлефон для даведак: (8 017) 293 27 52.
Матэрыял пададзены аддзелам абслугоўвання спецыялізаванымі фондамі.