10–14 лютага Нацыянальная бібліятэка Беларусі традыцыйна прымала ўдзел у XVII Мінскай міжнароднай кніжнай выстаўцы-кірмашы, якая праходзіла ў Нацыянальным выставачным цэнтры “БелЭкспа”.
Кніжная выстаўка ў Мінску з кожным годам набывае ўсё большы аўтарытэт, гэта пацвярджае пастаянны рост колькасці краін-удзельніц, а таксама наведвальнікаў. Сёлета свае стэнды прадставілі 619 экспанентаў з 26 краін. Ганаровым госцем выстаўкі выступіла Францыя, якая экспаніравала кніжныя навінкі, творы сучасных аўтараў і ў першую чаргу выданні на французскай мове.
На экспазіцыйна-выставачным стэндзе Нацыянальнай бібліятэкі Беларусі было прадстаўлена больш як 50 інфармацыйных выданняў. Наведвальнікі выстаўкі маглі пазнаёміцца з друкаванай прадукцыяй (матэрыяламі канферэнцый, бібліяграфічнымі паказальнікамі, выданнямі, якія папулярызуюць фонд бібліятэкі) і электроннай прадукцыяй: базамі даных па гісторыі, культуры, мастацтве Беларусі, як бібліяграфічнымі, так і поўнатэкставымі.
Вялікую зацікаўленасць у наведвальнікаў выклікалі такія выданні, як “Нацыянальная бібліятэка Беларусі”, “Рарытэты Нацыянальнай бібліятэкі Беларусі”, “Бібліятэчная справа на Беларусі: дакументы і матэрыялы (IX – пачатак XX ст.)”, бібліяграфічны ўказальнік “Дзіцячая літаратура Беларусі. 1996–2000 гг.”, а таксама камплекты паштовак. Сярод электронных выданняў найбольш папулярнымі аказаліся наступныя: “Электронная библиотека – школьникам”, “Зводны каталог. Кніга Беларусі”, “Radziviliana”, “Жыве паміж намі дудар наш…”,“Спадчына Напалеона Орды”.
10 лютага ў рамках XVII Мінскай міжнароднай кніжнай выстаўкі-ярмаркі ў музеі кнігі Нацыянальнай бібліятэкі Беларусі адкрылася экспазіцыя “Французскі аўтограф”, якая ладзіцца да 15 сакавіка.
11 лютага ў традыцыйны “Бібліятэчны дзень” у канферэнц-зале НВЦ “БелЭкспа” Нацыянальнай бібліятэкай Беларусі быў арганізаваны круглы стол “Электронная кніга – кніга сучаснага і будучага”.
У рамках правядзення выстаўкі Нацыянальная бібліятэка Беларусі прыняла ў якасці дарунка друкаваныя выданні. Фонды бібліятэкі папоўніліся больш чым на 15 000 тысяч экзэмпляраў (ад выдавецтваў Расійскай Федэрацыі, Украіны, Літвы, Казахстана, Польшчы, Германіі, Таджыкістана). Сярод падараваных выданняў – мастацкая літаратура, энцыклапедыі і даведнікі, альбомы, камплекты часопісаў. Тэматыка літаратуры – у асноўным гуманітарнага і краязнаўчага характару.
Нацыянальная бібліятэка Беларусі як рэспубліканскі інфармацыйны і сацыякультурны цэнтр паказала сябе ў якасці вельмі добрага выдаўца і не ўступала па якасці выдавецкай прадукцыі другім удзельнікам выстаўкі-кірмашу.
Нацыянальная бібліятэка Беларусі ўзнагароджана Дыпломам XVІІ Мінскай міжнароднай кніжнай выстаўкі-кірмашу “За актыўны ўдзел” і Дыпломам Міністэрства інфармацыі Рэспублікі Беларусь “За шматгадовае плённае супрацоўніцтва і прапаганду беларускай кнігі”.
 |
 |
 |
 |
 |
 |
 |
 |
 |
