Штогод у рамках святкавання Сусветнага дня кнігі і аўтарскага права і Міжнароднага дня інтэлектуальнай уласнасці Нацыянальная бібліятэка Беларусі падпісвае ліцэнзійныя дагаворы з аўтарамі. Сёлета традыцыя падоўжылася.
Таццяна Васільеўна Кузьмініч, кандыдат педагагічных навук, дацэнт, перадала НББ права на выкарыстанне яе твораў. Гэта навуковыя, навукова-метадычныя кніжныя выданні па тэорыі і гісторыі беларускай бібліяграфіі, артыкулы, прысвечаныя арганізацыйным, тэхналагічным праблемам фарміравання інфармацыйных рэсурсаў і іншым актуальным пытанням бібліятэчнай дзейнасці, апублікаваныя з 1993 па 2021 год. Электронная бібліятэка НББ папоўнілася 80-цю дакументамі.
Таццяна Васільеўна Кузьмініч – бібліятэка-бібліёграф, філолаг, выкладчык беларускай мовы і літаратуры. З 1996 па 2003 год выкладала ў Беларускім дзяржаўным універсітэце культуры і мастацтваў. З 2004 года пачала сваю прафесійную дзейнасць у Нацыянальнай бібліятэцы Беларусі на пасадзе намесніка дырэктара па інфармацыйных рэсурсах, з 2020 па 2022 год – намеснік генеральнага дырэктара – дырэктар па інфармацыйных рэсурсах. Старшыня выканаўчага камітэта Савета бібліятэк Беларусі па інфармацыйным узаемадзеянні (2010-2022).Узнагароджана Ганаровай граматай Адміністрацыі Прэзідэнта Рэспублікі Беларусь (2006), нагрудным знакам Міністэрства культуры Рэспублікі Беларусь “За ўклад у развіццё культуры Беларусі” (2007), Ганаровай граматай Міністэрства адукацыі Рэспублікі Беларусь, нагрудным знакам “Юбілейны медаль у гонар 80-годдзя Нацыянальнай акадэміі навук Беларусі” (2010), медалём “За працоўныя заслугі” (2011), Ганаровай граматай Міністэрства культуры Рэспублікі Беларусь (2020).
Нацыянальная бібліятэка Беларусі выказвае падзяку Таццяне Васільеўне за каштоўны падарунак для ўсёй беларускай бібліятэчнай супольнасці – ад студэнтаў да прафесіяналаў.
Матэрыял пададзены аддзелам фарміравання электроннай бібліятэкі.