5 красавіка мастак Сяргей Радзюк прадставіць у бібліятэцы выставачны праект “Рамантычны авантурызм”.
Сяргей Радзюк з'яўляецца членам Саюза мастакоў Расіі, а таксама заснавальнікам аб’яднання мастакоў “Сонечны квадрат”. На яго рахунку больш за 80 персанальных выставак. Карціны мастака знаходзяцца ў дзяржаўных музеях Люксембурга, Паўднёвай Карэі, В'етнама, Беларусі і Расіі, а таксама ў прыватных калекцыях Патрыярха Маскоўскага і ўсяе Русі Кірыла, Вялікага герцага Люксембурга, караля Камбоджы, вядомых знатакоў мастацтва ўсяго свету.
Работы Сяргея Радзюка выкананы ў розных напрамках і жанрах. Яны прадстаўляюць рэалістычны, беспрадметны жывапіс, мадэрн і аўтарскія эксперыменты ў адкрытым ім стылі – джаз. У сваёй творчасці аўтар звяртаецца да змешанай тэхнікі – спалучае жывапіс з элементамі калажу, выкарыстоўваючы манеты, свечкі і іншыя аб'ёмныя дэталі.
Сярод найбольш вядомых работ мастака на выстаўцы прадстаўлены рамантычныя і фантасмагарычныя пейзажы. Вядомая серыя карцін “Дамы прыляцелі”, якая паказвае гледачу нерэальныя сюжэты пра лёгкіх, бязважкіх дзяўчын, здольных снедаць у аблоках і гушкацца на дрэвах, пераносіць наведвальнікаў выстаўкі да эпохі Сярэбранага веку.
Вернісаж пачнецца а 16-й гадзіне ў галерэі “Панарама” (22-гі паверх). Выстаўка будзе доўжыцца да 5 мая 2016 года.
З 6 красавіка ўваход на выстаўку платны, складае кошт наведвання агляднай пляцоўкі.
Тэлефоны для даведак: (8 017) 293 27 56, 293 28 33.
Е-mail: pr@nlb.by
