20 чэрвеня ў Нацыянальнай бібліятэцы Беларусі адбылася дыялогавая пляцоўка “З моладдзю на роўных”. Эксперты па паслявузаўскай самаадукацыі моладзі, прадстаўнікі ўстаноў і арганізацый распавялі студэнтам аб адкрытых вакансіях і падзяліліся інфармацыяй аб размеркаванні пасля заканчэння ўніверсітэта.
Генеральны дырэктар бібліятэкі Аксана Кніжнікава выступіла з прэзентацыяй аб галоўнай бібліятэцы краіны, яе інфармацыйных рэсурсах, сацыякультурнай дзейнасці і патэнцыяле для самаадукацыі і працы маладых спецыялістаў.
У мерапрыемстве ўзялі ўдзел намеснік старшыні Мінскага гарвыканкама Арцём Цуран, начальнік галоўнага ўпраўлення ідэалагічнай работы і па справах моладзі Мінгарвыканкама Вольга Чамаданава, прадстаўнікі Міністэрства працы і сацыяльнай абароны Рэспублікі Беларусь, Міністэрства аховы здароўя Рэспублікі Беларусь, Міністэрства адукацыі Рэспублікі Беларусь, Міністэрства жыллёва-камунальнай гаспадаркі Рэспублікі Беларусь, маладыя спецыялісты і выпускнікі ўстаноў вышэйшай і прафесійнай адукацыі.
Увазе выпускнікоў была прадстаўлена тэматычная выстава-кірмаш буйных прадпрыемстваў Мінска. Таксама для ўдзельнікаў мерапрыемства была праведзена экскурсія па “алмазе ведаў”, падчас якой госці пазнаёміліся з архітэктурай і мастацкім афармленнем будынка, больш даведаліся пра векавую гісторыю Нацыянальнай бібліятэкі, пабывалі ў музеі кнігі, падняліся на аглядную пляцоўку і палюбаваліся Мінскам з вышыні птушынага палёту.
Арганізатарамі мерапрыемства выступілі Нацыянальная бібліятэка Беларусі і Мінскі гарадскі выканаўчы камітэт.
Матэрыял пададзены аддзелам сувязей з грамадскасцю.
