Нацыянальная бібліятэка Беларусі прыняла ўдзел у святкаванні юбілейнага ХХ Дня беларускага пісьменства, які прайшоў у Быхаве з 31 жніўня па 1 верасня.
Галоўным сімвалам свята стаў знакаміты Баркалабаўскi летапiс, якому ва ўрачыстай атмасферы быў адкрыты помнік – першая скульптура кніжнаму помніку ў Беларусі.
Спецыяльна да свята Нацыянальная бібліятэка Беларусі падрыхтавала выстаўку-прэзентацыю “Славутая зямля славутых продкаў”, якая была прысвечана кніжным помнікам і знакамітым асобам, звязаным з гісторыяй Быхава і Быхаўскай зямлі. Кніжную экспазіцыю склалі больш за 50 выданняў.
Была прадстаўлена тэматычная навуковая, навукова-папулярная і даведачная літаратура. Дэманстраваліся ўнікальныя і рэдкія выданні: кнігі з дароўнымі надпісамі даследчыкаў Баркалабаўскага летапісу П. Куліша, Е. Раманава, М. Улашчыка; старадрукі з кніжнага збору ХVІІ–ХVІІІ ст. каталіцкага манастыра канонікаў латэранскіх у Быхаве, а таксама кніга “Путевые записки русского художника И. Захарова, собранные во время путешествия по России, Турции, Греции, Италии и Германии” (1854), у якой змяшчаецца падрабязнае апісанне Быхава сярэдзіны ХІХ стагоддзя.
На выстаўцы шырокаму колу наведвальнікаў і ўдзельнікам святочнага мерапрыемства ўпершыню было прадстаўлена 2-томнае выданне “Баркалабаўскi летапiс”, якое ажыццявіла Нацыянальная бібліятэка Беларусі і выдавецтва “Беларуская энцыклапедыя імя П. Броўкі”. Першы том з’яўляецца факсіміле, другі – даследаванне і тэкст летапісу. Прадстаўнікі Нацыянальнай бібліятэкі Беларусі прынялі ўдзел у падрыхтоўцы і правядзенні прэзентацый гэтага выдання пад час Быхаўскіх чытанняў і фестывалю кнігі і прэсы.
 |
 |
 |
 |
 |
 |
 |
 |
 |
 |
