16 мая ў горадзе Джызак (Рэспубліка Узбекістан) пачала сваю працу XVII Міжнародная канферэнцыя “Central Asia – 2024: інтэрнэт і інфармацыйна-бібліятэчныя рэсурсы ў навуцы, адукацыі, культуры і бізнесе”.
Нацыянальную бібліятэку Беларусі на канферэнцыі прадставіў генеральны дырэктар Вадзім Гігін, які ў рамках урачыстай цырымоніі адкрыцця звярнуўся да ўдзельнікаў канферэнцыі з прывітальным словам. На пленарным пасяджэнні ён прадставіў даклад аб сучасных інфармацыйна-камунікацыйных тэхналогіях у рабоце бібліятэк.
У пасяджэнні таксама ўзяў удзел старшыня Савета Беларускай бібліятэчнай асацыяцыі, дырэктар Фундаментальнай бібліятэкі Беларускага дзяржаўнага ўніветсітэта Уладзімір Кулажанка.
Усяго ў канферэнцыі прымае ўдзел больш за 300 дэлегатаў з краін СНД і далёкага замежжа, сярод якіх дырэктары бібліятэк, кіраўнікі і спецыялісты інфармацыйна-рэсурсных і інфармацыйна-бібліятэчных цэнтраў, спецыялісты архіваў, музеяў, вучоныя, выкладчыкі адукацыйных устаноў, грамадскія дзеячы, прадстаўнікі міністэрстваў і ведамстваў.
Арганізатары канферэнцыі: Агенцтва інфармацыі і масавых камунікацый пры Адміністрацыі Прэзідэнта Рэспублікі Узбекістан, Міждзяржаўны фонд гуманітарнага супрацоўніцтва дзяржаў-удзельніц СНД, Нацыянальная бібліятэка Узбекістана імя Алішэра Наваі, агенцтва “Узархіў”, Ташкенцкі ўніверсітэт інфармацыйных тэхналогій імя Мухамада ал-Харазмі, Дзяржаўны інстытут мастацтваў і культуры Узбекістана.
Матэрыял пададзены аддзелам сувязей з грамадскасцю.