Другая міжнародная навукова-практычная канферэнцыя “Ахова і папулярызацыя культурнай спадчыны: сусветны і айчынны вопыт”, прысвечаная Году міру і стварэння, праходзіла ў Віцебску з 26 па 27 кастрычніка. Спецыялісты розных прафесій сферы культуры сабраліся разам, каб абмеркаваць самыя актуальныя пытанні аховы гісторыка-культурнай спадчыны.
У навуковай частцы канферэнцыі прынялі ўдзел спецыялісты з розных гарадоў Беларусі, а таксама Расіі, Узбекістана, Італіі, Кітая. Прадстаўнікі рэстаўрацыйных майстэрняў, архітэктурных бюро, гісторыкі, даследчыкі і навукоўцы за круглым сталом дзяліліся прафесійнымі меркаваннямі і каментарамі. На падставе ўсяго агучанага была выпрацавана рэзалюцыя, якую накіравалі ў Міністэрства культуры Рэспублікі Беларусь.
Нацыянальную бібліятэку Беларусі прадставіла вядучы бібліёграф інфармацыйна-аналітычнага аддзела Ніна Літвінка. Яна паўдзельнічала ў дыскусіі пра ахову спадчыны падчас круглага стала, а на другім пленарным пасяджэнні агучыла даклад на тэму: “Канвалют першай паловы XVII стагоддзя: кніжная калекцыя эпохі Барока пад адной вокладкай”. Гэта выступленне з цікавасцю было ўспрынята прысутнымі, у прыватнасці, з асаблівай увагай слухалі, а пасля задавалі пытанні студэнты-гісторыкі Віцебскага дзяржаўнага ўніверсітэта імя П.М. Машэрава, якія таксама прысутнічалі на канферэнцыі.
Падчас мерапрыемства адбылася прэзентацыя выдання “Віцебск. 5 плошчаў”, 13-й па ліку кнігі доктара мастацтвазнаўства, прафесара, віцябчанкі Таццяны Катовіч. Для таго, каб большая колькасць людзей змагла азнаёміцца з яе напрацоўкамі, аўтар бясплатна прадставіла ўсе выданні ў інтэрнэт-прасторы.
Пасля завяршэння асноўных мерапрыемстваў для ўдзельнікаў была арганізавана экскурсія ў Музей гісторыі Віцебскага народнага мастацкага вучылішча і арт-прастору “Талстога, 7”. Гэта стала добрым завяршэннем двух дзён плённай працы канферэнцыі.
Матэрыял падрыхтаваны інфармацыйна-аналітычным аддзелам.
