24 лютага ў межах праекта “Клуб кніжных прафесараў” адбыліся заняткі “Партрэт першадрукара”.
Агульнавядомым з’яўляецца партрэт Францыска Скарыны, які быў змешчаны двойчы ў яго кнігах. У гісторыі кнігі гэта самы ранні, калі не першы з партрэтаў друкароў. У гэтым сэнсе Скарына праяўляе сябе як яркі прадстаўнік Рэнесансу, які ўпэўнена заяўляе пра сябе. Партрэт з’яўляецца вельмі змястоўным, бо дае інфармацыю не толькі пра аблічча асветніка, але і пра гісторыка-культурны кантэкст.
Першым жывапісным партрэтам нашага перашадрукара з’яўляецца партрэт рукі Язэпа Драздовіча. У 1927 годзе і першай палове 1940-х гадоў мастак напісаў шэраг карцін і акварэлей, прысвечаных Францыску Скарыну.
Партрэты асветніка стваралі знакамітыя беларускія мастакі Іван Ахрэмчык, Гаўрыла Вашчанка, Мікалай Байрачны, Віктар Шматаў, Валянцін і Ляіля Варэцы і іншыя.
На выстаўцы “Pencil & пэндзаль” дзеткі разглядалі партрэт, створаны мастаком Паўлам Татарнікавым.
У другой частцы заняткаў удзельнікі самі ўзяліся за стварэнне партрэтаў, аднак падышлі да творчага задання арыгінальна. Яны зрабілі тантамарэскі – яркія стэнды для фотаздымкаў з адтулінай для твару. У выніку кожны ўдзельнік ненадоўга стаў беларускім першадрукаром.
Матэрыял прадастаўлены навукова-выдавецкім аддзелам кнігазнаўства.
