У канцы красавіка ў Гомельскай абласной бібліятэцы імя У.І. Леніна была арганізавана выстаўка-прагляд "Край, асвечаны бусламі", прысвечаная 90-годдзю з часу заснавання Гомельскай губерні.
Чытачам прыйшлася даспадобы з густам аформленая выстаўка, іх вельмі зацікавілі матэрыялы, што тут экспанаваліся. А здзівіць было чым. На выстаўцы былі прадстаўлены не толькі традыцыйныя кніжныя выданні, але і фотаздымкі, копіі загадаў і пастаноў, справаздачы аб палітычным і эканамічным становішчы губерні, хронікі падзей, зафіксаваных дзень за днём, паштоўкі, буклеты, электронныя рэсурсы і іншыя матэрыялы, што захоўваюцца ў аддзеле краязнаўства.
Экспазіцыя складалася з пяці тэматычных комплексаў. Першы экспанат выстаўкі – пашпарт Гомельскай вобласці, дзе дадзены эканамічныя характарыстыкі і асноўныя этапы развіцця рэгіёна.
Раздзел “3 сівой даўніны” дазволіў пазнаёміцца з кнігамі, артыкуламі з часопісаў, што асвятлялі адметны перыяд змены эпох – перыяд устанаўлення савецкай ўлады, антыбальшавіцкіх выступленняў, пераадолення разбурэнняў падчас грамадзянскай вайны, развіцця гаспадаркі і выканання праграм па індустрыялізацыі і калектывізацыі.
Амаль усе матэрыялы раздзела "Імгненні гісторыі" прадастаўлены Дзяржаўным архівам Гомельскай вобласці. Цікавыя асобы, факты, падзеі гісторыі, зафіксаваныя ў дакументах і фотаздымках, дазволілі зазірнуць у мінулае.
“Гомельшчына: здабыткі і перспектывы" – раздзел, што апавядаў пра развіццё прамысловых прадпрыемстваў, дасягненні ў эканоміцы і сельскай гаспадарцы ад моманту заснавання Гомельскай губерні да нашых дзён.
Раздзел "Жыватворныя крыніцы” пазнаёміў з навуковым і культурным патэнцыялам рэгіёна, фальклорна-этнаграфічнай спадчынай. Увагу наведвальнікаў прыцягнулі багата ілюстраваныя кнігі па дэкаратыўна-прыкладным мастацтве, народнай творчасці, біяграфіі дзеячаў культуры, а таксама альбомы, прысвечаныя выдатным мастакам А. Ісачову, Г. Вашчанку, А. Шаўчэнку.
Наведвальнікі выстаўкі не абмінулі ўвагай і радзел “У вянок Гомельшчыны", дзе былі прадстаўлены творы як пісьменнікаў-класікаў, так і аматараў. Асабліва ўразілі кнігі з аўтографамі I. Шамякіна, I. Мележа, У. Гаўрыловіча, В. Ткачова, Ю. Фатнева, Н. Шкляравай і іншых.
