20 чэрвеня ў музеі Максіма Багдановіча ў Мінску адбылася прэзентацыя кнігі фіналістаў конкурсу маладых літаратараў імя Ў. Караткевіча “Групавы партрэт з Бабай Броняй”.
Праўда, “Групавы партрэт з Бабай Броняй” атрымаўся без Бабы Броні - маладога празаіка Макса Восіпава, які, атрымаўшы свой аўтарскі асобнік кніжкі, знік, не жадаючы прыцягваць увагу да сваёй асобы. Кніга складаецца з вершаў, прозы, перакладаў дваццаці маладых літаратараў, сярод якіх толькі адзін рускамоўны - Павел Анціпаў. Падчас прэзентацыі свае творы прачыталі Павел Свярдлоў, Яўгенія Манцэвіч, Алесь Сушчэўскі, Алеся Башарымава і іншыя, спецыяльна запрошаны гурт “band_a” праспяваў свае песні, а ўкладальнік і рэдактар кнігі Андрэй Хадановіч прадэкламаваў свае новыя вершы. Дарэчы, адным з аўтараў кнігі з’яўляецца ўнук народнага пісьменніка Беларусі Янкі Брыля - Антон Францішак Брыль, які зараз жыве і вучыцца ў Італіі. На конкурс ён падаваў свае творы пад псеўданімам, але ў кнізе з ягонай згоды раскрылі яго сапраўднае імя. Нагадаем, што конкурс праводзіўся беларускім ПЭН-цэнтрам у 2005 годзе і быў прымеркаваны да юбілею Уладзіміра Караткевіча, але кніга з творамі пераможцаў конкурсу выйшла толькі праз два гады з-за фінансавых цяжкасцяў. На жаль, у кнізе змешчаны толькі творы маладых аўтараў і ніякай інфармацыі пра іх саміх.