У Нацыянальнай бібліятэцы Рэспублікі Беларусь прайшла рабочая сустрэча намесніка генеральнага дырэктара, старшыні Міжнароднай Асацыяцыі беларусістаў Алеся Сушы з дырэктарам – галоўным рэдактарам Выдавецкага дома «Звязда», галоўным рэдактарам газеты «Звязда» Алесем Карлюкевічам. Размова была прысвечана арганізацыі шэрагу сумесных праектаў па прэзентацыі кніжных навінак Выдавецкага дома «Звязда» ў Нацыянальнай бібліятэцы.
У апошні час у выдавецтве пабачылі свет кнігі такіх сучасных беларускіх пісьменнікаў, публіцыстаў, як Леанід Дранько-Майсюк, Людміла Рублеўская, Інэса Плескачэўская, Ірына Карнавухава, Ягор Конеў, Кацярына Хадасевіч-Лісавая…
Алесь Суша прапанаваў правесці цыкл мерапрыемстваў у рэжыме афлайн і анлайн адначасова, каб прэзентаваць паэтычныя зборнікі, што выйшлі ў «Звяздзе» апошнім часам, ‒ кнігі Анатоля Сыса, Генадзя Бураўкіна, Леаніда Дранько-Майсюка. «І ў нашай бібліятэцы ёсць спецыфічны чытач, які прыходзіць наўмысна, каб пачытаць паэзію, звярнуцца да новых паэтычных кніг», ‒ заўважыў пры гэтым Алесь Аляксандравіч.
Аўтар публікацыі: Сяргей Шычко.
Крыніца: Созвучие
