Са святам, абаронцы!

Напярэдадні Дня абаронцаў Айчыны і Узброеных Сіл Рэспублікі Беларусь у канферэнц-зале бібліятэкі прайшло ўрачыстае мерапрыемства “А для салдата галоўнае...”.

Цёплыя віншаванні прагучалі ў адрас віноўнікаў урачыстасці ад першага намесніка дырэктара Нацыянальнай бібліятэкі Беларусі Алены Далгаполавай.

З рук “галоўнакамандуючага” бібліятэкі Рамана Матульскага граматы Міністэрства культуры Рэспублікі Беларусь атрымалі лепшыя з лепшых сярод нашых калег-абаронцаў.

За шматгадовую добрасумленную працу, высокі прафесіяналізм, значны асабісты ўклад у развіццё і папулярызацыю нацыянальнай культуры Ганаровай граматай Міністэрства культуры Рэспублікі Беларусь удастоены Станіслаў Каспяровіч, намеснік дырэктара па эканоміцы, рэжыму, эксплуатацыі будынка і абсталявання Нацыянальнай бібліятэкі Беларусі.

Грамату Міністэрства культуры Рэспублікі Беларусь за шматгадовую добрасумленную працу, значны ўклад у папулярызацыю нацыянальнай культуры атрымаў Ігар Медзікаў, начальнік аддзела прававой і кадравай работы Нацыянальнай бібліятэкі Беларусі.

У гэты святочны дзень са сцэны канферэнц-залы гледачоў радавалі і здзіўлялі салістка ансамбля Інстытута пагранічнай службы Рэспублікі Беларусь Марыяна Грыневіч, тэатр танца “Адлюстраванні”, дуэт "Jazz Fm", гурт “Чараўніцы” і сілавое шоу братоў Казаковых.

Сярод артыстаў былі і нашы калегі – метадыст аддзела культурна-відовішчнай дзейнасці Лізавета Сіроткіна і вядучы інжынер-энергетык аддзела абслугоўвання электратэхнічнага абсталявання і ліфтаў Васіль Прус.

Дарагія абаронцы Айчыны!
Віншуем вас з гэтым асаблівым лютаўскім днём!
Няхай усе перашкоды на вашым шляху растануць, як снег вясной. Здароўя, невычэрпнай энергіі і дабрабыту!

Матэрыял прадастаўлены аддзелам сувязей з грамадскасцю.