Дата правядзення
Час правядзення
Месца правядзення
Сёлета грамадскасць краіны адзначае 400-гадовы юбілей з дня заснавання Куцеінскага Богаяўленскага манастыра. Манастыры здаўна былі цэнтрамі духоўнай асветы і кніжнай мудрасці. Куцеінскі манастыр – адзін з найстаражытнейшых праваслаўных асяродкаў духоўнай і кніжнай культуры XVII ст.
У 1623 г. панам Багданам Статкевічам быў дадзены фундуш на будаўніцтва праваслаўнага манастыра Богаяўлення пад Оршай. Куцеінскі манастыр дзейнічаў таксама як кніжны асяродак. Друкарня працавала пры ім у 1630–1654 гг. У манастырскай друкарні выдавалася навукова-асветніцкая, царкоўна-палемічная і свецкая літаратура на царкоўнаславянскай і старабеларускай мовах. Выданні вылучаліся своеасаблівым графічным афармленнем.
Адкрыццё выставы “Кніжныя скарбы Куцеінскага манастыра” адбылося 19 кастрычніка ў музеі кнігі. На ёй наведвальнікі атрымаюць магчымасць пазнаёміцца са старонкамі гісторыі манастыра, а таксама з выданнямі манастырскай друкарні і кнігамі манастырскай бібліятэкі. Са збораў Нацыянальнай бібліятэкі экспануюцца рукапісны помнік XVIII ст. – Сінодзік Куцейнскага манастыра, узор перакладной літаратуры “Казанне пра Варлаама і Іасафа” (1637), “Брашна духоўнае” (1639), “Актоіх” Іаана Дамаскіна (1646), Новы Запавет з Псалтыром (1652), адно з найпрыгажэйшых богаслужбовых выданняў “Трыфалагіён” (1647) і “Лексікон...” Памвы Бярынды (1653). Таксама ўвазе зацікаўленых прадстаўлены шэраг кірылічных выданняў і рукапісаў ХVII–XVIII стст. з запісамі Куцеінскага манастыра. Сярод іх – рукапісны нотны Ірмалогій ХVII ст., еўінскае выданне Евангелля вучыцельнага 1616 г., маскоўскія і кіеўскія богаслужбовыя старадрукі.
Экспазіцыя створана ў рамках Х Міжнароднага кангрэса “Бібліятэка як феномен культуры” і будзе працаваць у музеі кнігі да 30 лістапада 2023 г.
Дата яе завяршэння можа быць зменена.
Час работы выставы адпавядае рэжыму работы музея кнігі.
Уваход – па чытацкім білеце або білеце сацыякультурнага цэнтра.
Тэлефоны для даведак: (8 017) 293 27 81, (8 017) 293 27 22.
Матэрыял пададзены навукова-даследчым аддзелам кнігазнаўства.