Тэматычная выстава “Бяспечная, рэгуляваная і легальная міграцыя ў XXI стагоддзі”, прысвечаная Міжнароднаму дню мігранта, адкрыта з 15 снежня па 16 студзеня ў аддзеле абслугоўвання афіцыйнымі дакументамі (пам. 207).

Улічваючы вялікую колькасць мігрантаў і яе рост у свеце, 4 снежня 2000 года Генеральная асамблея на сваёй 55-й сесіі абвясціла 18 снежня Міжнародным днём мігранта (рэзалюцыя 55/93). У гэты дзень у 1990 годзе была прынята Міжнародная канвенцыя аб абароне праў усіх працоўных мігрантаў і членаў іх сем’яў (рэзалюцыя 45/158). Гэтая канвенцыя з’яўляецца ўсёабдымнай праграмай абароны праў мігрантаў – па стане на 1 кастрычніка 2021 года яе ратыфікавала 56 дзяржаў.

Прапанаваная выстава налічвае каля 100 дакументаў на рускай, англійскай і нямецкай мовах. Гэта кнігі, брашуры, мімеаграфаваныя матэрыялы ААН, перыядычныя выданні, буклеты.

Гэтыя дакументы пазнаёмяць чытача з калектыўнымі намаганнямі дзяржаў і міжнародных арганізацый, накіраванымі на забеспячэнне абароны праў мігрантаў, іх адаптацыю і інтэграцыю ў прымаючых краінах, на паляпшэнне кіравання міграцыяй.

Прадстаўленыя на выставе матэрыялы знаёмяць са становішчам мігрантаў у свеце, дзейнасцю Міжнароднай арганізацыі па міграцыі (МАМ), Глабальнай камісіі па міжнароднай міграцыі, а таксама з дзяржаўнай палітыкай Рэспублікі Беларусь, накіраванай на рэгуляванне працэсаў міграцыі і аказанне дапамогі мігрантам у іх пошуку бяспечнага жыцця, міру і стабільнасці.

Сярод прадстаўленых на выставе экспанатаў – зборнікі міжнародна-прававых дакументаў і нацыянальных заканадаўчых актаў па пытаннях міграцыі, манаграфіі, матэрыялы даследаванняў па працоўнай міграцыі, практычныя і навучальныя дапаможнікі, матэрыялы навукова-практычных канферэнцый.

Экспазіцыя ўключае наступныя тэматычныя раздзелы:

Міжнародная міграцыя і міграцыйнае права
Аб’ёмы і дынаміка міжнароднай міграцыі
Міграцыйная палітыка і супрацоўніцтва ў сферы міграцыі
Міжнародная працоўная міграцыя
Міграцыйныя працэсы ў Рэспубліцы Беларусь

Выстава будзе карысная спецыялістам у галіне міжнародных адносін, юрыстам, палітолагам, навуковым супрацоўнікам, выкладчыкам, студэнтам вышэйшых навучальных устаноў, а таксама ўсім, хто цікавіцца сучаснымі тэорыямі і праблемамі міграцыі.

Міжнародная міграцыя – гэта адна з асноўных адметных асаблівасцей нашага пераменлівага свету. У апошнія гады адсутнасць бяспекі, наступствы змены клімату, войны і канфлікты ў значнай ступені спрыялі вымушанаму перамяшчэнню як унутры краін, так і праз межы. У 2020 годзе больш за 281 мільён чалавек былі міжнароднымі мігрантамі, а да канца 2021-га больш за 59 мільёнаў чалавек былі ўнутрана перамешчанымі асобамі.

Карысныя спасылкі