Прэзентацыя кнігі “Нацыянальныя паркі – жамчужыны Беларусі”

11 студзеня а 16-й гадзіне ў галерэі “Лабірынт” Нацыянальнай бібліятэкі Беларусі адбудзецца прэзентацыя выдання “Нацыянальныя паркі – жамчужыны Беларусі” сумесна з выдавецтвам “Беларусь”.

Мерапрыемства прымеркавана да Сусветнага дня запаведнікаў і нацыянальных паркаў, што адзначаецца 11 студзеня. Гэта свята актуалізуе праблему ахоўных прыродных тэрыторый, што дае магчымасць зберагчы ад гібелі частку дзікай прыроды і жывёльнага свету.

Кніга “Нацыянальныя паркі – жамчужыны Беларусі” прысвечана асабліва ахоўваемым прыродным тэрыторыям нашай краіны – чатыром нацыянальным паркам ("Белавежская пушча", "Браслаўскія азёры", "Нарачанскі", "Прыпяцкі"), Бярэзінскаму біясфернаму і Палескаму радыяцыйна-экалагічнаму запаведнікам. Аўтар фота і тэкстаў – Ігар Бышнёў. Таксама выкарыстаны матэрыялы, прадстаўленыя дзяржаўнымі прыродаахоўнымі і навукова-даследчымі ўстановамі.

На старонках кнігі можна пазнаёміцца з гісторыяй стварэння нацыянальных паркаў і запаведнікаў Беларусі, з іх жывёльным і раслінным светам, многія прадстаўнікі якіх занесены ў Чырвоную кнігу Рэспублікі Беларусь.

У прэзентацыі возьмуць удзел Ігар Бышнёў, прадстаўнікі выдавецтва, Міністэрства прыродных рэсурсаў і аховы навакольнага асяроддзя, бібліятэкары.

Да мерапрыемства Нацыянальная бібліятэка падрыхтавала выстаўку-прагляд “Падарожжа ў свет прыроды Беларусі”, дзе кожны жадаючы можа пазнаёміцца з навукова-папулярнымі выданнямі, даведнікамі ў ілюстрацыях, фотаальбомамі, турыстычнымі буклетамі па тэме з фондаў бібліятэкі. Экспазіцыя працягне працу ў кальцавой галерэі 2-га паверха да 3 сакавіка.

Тэлефон: (8 017) 368 37 37 (для даведак), (8 017) 293 27 56 (для СМІ).