Адкрыццё другой выстаўкі з цыкла “Зара вызвалення займаецца над Беларуссю” і прэзентацыя кніг Дзмітрыя Чарняўскага

23 студзеня адбылося адкрыццё другой выстаўкі з цыкла “Зара вызвалення займаецца над Беларуссю”, прымеркаванага да 80-годдзя вызвалення краіны ад нямецка-фашысцкіх захопнікаў.

Экспазіцыя прадставіць хроніку вызвалення са студзеня па сакавік 1944 г. У кніжна-дакументальным шэрагу – факты і ўдзельнікі Калінкавіцка-Мозырскай (8 студзеня – 8 лютага) і Рагачоўска-Жлобінскай (21–26 лютага) наступальных аперацый Беларускага фронту. Вынікам аперацый, якія доўжыліся з невялікімі перапынкамі з верасня 1943 г., стала вызваленне 2 з 10 абласных, 36 са 188 раённых цэнтраў і прыкладна 1/5 часткі тэрыторыі Беларусі. Пасля пачалася шматмесяцовая падрыхтоўка да маштабнай беларускай наступальнай аперацыі “Баграціён”, якой будзе прысвечана трэцяя частка цыкла.

У межах мерапрыемства журналіст газеты “Гомельскія ведамасці” Дзмітрый Чарняўскі прэзентуе ўнікальныя выданні, прысвечаныя памяці і гісторыі паўсядзённага жыцця ветэранаў – герояў-вызваліцеляў Беларусі. Сярод іх – дакументальна-мастацкі твор “Боевые дороги Григория Ильина, или 300 дней на запад”, дзе панарамна паказаны летапіс вызвалення з 23 верасня 1943 г. па 28 ліпеня 1944 г., і дакументальная фотакніга “Устами фронтовиков”. Кнігі аб’ядноўвае шматгадовая праца Дзмітрыя, супрацоўнікаў рэдакцыі газеты і гомельскіх фатографаў, якую яны распачалі да 70-й гадавіны вызвалення нашай краіны ад фашыстаў.

Уваход – па чытацкім білеце або білеце сацыякультурнага цэнтра.
Час работы выстаўкі адпавядае рэжыму работы бібліятэкі.

Тэлефон: (8 017) 368 37 37 (для даведак), (8 017) 293 27 56 (для СМІ).

Чытайце таксама:

• Адкрыццё першай выстаўкі цыкла “Зара вызвалення займаецца над Беларуссю”