20 красавіка, напярэдадні Сусветнага дня кнігі і аўтарскага права і Міжнароднага дня інтэлектуальнай уласнасці, у бібліятэцы прайшоў адукацыйны семінар “Новая рэдакцыя Закона Рэспублікі Беларусь «Аб аўтарскім праве і сумежных правах»”.
Арганізатарамі выступілі Нацыянальная бібліятэка Беларусі сумесна з Нацыянальным цэнтрам інтэлектуальнай уласнасці (НЦІУ).
Семінар прайшоў у змешаным фармаце: больш за 40 чалавек прысутнічалі ў аўдыторыі і больш за 30 чалавек далучыліся анлайн.
З прывітальнымі словамі да ўдзельнікаў семінара звярнуліся намеснік генеральнага дырэктара – дырэктар па інфармацыйных рэсурсах і абслугоўванні карыстальнікаў Нацыянальнай бібліятэкі Беларусі Віктар Пшыбытка і генеральны дырэктар Нацыянальнага цэнтра інтэлектуальнай уласнасці Уладзімір Рабаволаў.
Андрэй Лучанок, намеснік начальніка аддзела абароны праў кіравання аўтарскага і сумежных праў НЦІУ, азнаёміў удзельнікаў семінара са зменамі ў заканадаўстве Рэспублікі Беларусь, звязанымі з пытаннямі калектыўнага кіравання маёмаснымі правамі.
Спецыялісты аддзела вялікіх праў кіравання аўтарскага і сумежных праў НЦІУ Аліна Труханёнак і Дар'я Касцючэнка расказалі пра вялікія правы ў калектыўным кіраванні.
Вядучы спецыяліст аддзела заканадаўства ў сферы аўтарскага і сумежных праў упраўлення прававога і кадравага забеспячэння НЦІУ Вікторыя Шадрына закранула праблемы аўтарскага права ў дзейнасці бібліятэк Беларусі.
Асаблівую цікавасць у слухачоў выклікала выступленне Сяргея Лосева, вядучага навуковага супрацоўніка аддзела даследаванняў у галіне грамадзянскага, экалагічнага і сацыяльнага права Нацыянальнага цэнтра заканадаўства і прававых даследаванняў Рэспублікі Беларусь. У яго дакладзе “Праблема «сіроцкіх» твораў і магчымыя шляхі яе вырашэння” былі закрануты актуальныя пытанні класіфікацыі і выкарыстання “сіроцкіх” твораў у бібліятэках.
Выступленні выклікалі ажыўленую дыскусію па пытаннях аблічбоўкі выданняў з бібліятэчных фондаў, прадстаўлення аддаленага доступу, узаемадзеяння з аўтарамі твораў.
З відэатрансляцыяй семінара можна азнаёміцца тут.
Матэрыял пададзены аддзелам фарміравання электроннай бібліятэкі.
