Больш за 100 фотаздымкаў, якія адлюстроўваюць тэндэнцыі моды 1970-х у БССР, папоўнілі электронную калекцыю “Мода і час”.
Ізаматэрыялы рубрык “Мода”, “Па заказах насельніцтва”, “Сучасны мужчына і трыкатаж” з часопіса “Служба быту Беларусі” дэманструюць апошнія павевы моды таго часу.
Стыль гэтага перыяду адрозніваўся разнастайнасцю каляровых рашэнняў. Адметная рыса – элегантнасць і прастата. Жаночай модзе былі ўласцівы плаўныя лініі, мяккія і лёгкія формы. Больш разнастайным стала мужчынскае адзенне.
У сярэдзіне 1970-х гадоў у модзе ўмацоўваецца народна-фальклорная традыцыя, або так званы стыль кантры. Папулярным становіцца адзенне з джынсу.
Як выглядала адзенне для жанчын і мужчын у Беларусі 1970-х? У якіх уборах жаніліся і выходзілі замуж? Якія аксэсуары былі ў трэндзе? Адказы на пытанні можна знайсці ў публікацыях электроннай калекцыі “Мода і час”.
Прадстаўлены ў электронным рэсурсе матэрыял разлічаны на шырокае кола карыстальнікаў і будзе карысны ўсім, хто цікавіцца моднымі тэндэнцыямі канца XX стагоддзя.
З фотаздымкамі можна азнаёміцца па спасылцы.
Матэрыял пададзены аддзелам фарміравання электроннай бібліятэкі.