У межах віртуальнага праекта “На хвалі часу, у плыні жыцця”, прымеркаванага да 100-годдзя літаб’яднання “Маладняк”, рэалізуюцца самыя розныя ініцыятывы: праводзяцца мерапрыемствы, далучаюцца зацікаўленыя даследчыкі і партнёры, наладжваюцца сувязі з нашчадкамі маладнякоўцаў. Несумненнай каштоўнасцю праекта з’яўляюцца алічбаваныя дакументы, сярод якіх не толькі артыкулы, але і кнігі.
У лістападзе 2020 г. адзначалася 115-годдзе з дня нараджэння пісьменніка Яна Скрыгана. Да гэтай даты Нацыянальная бібліятэка падрыхтавала новы віртуальны раздзел праекта, а таксама арганізавала літаратурны вечар “Кругі лёсу Яна Скрыгана”. Былі наладжаны сувязі з дачкой пісьменніка Галінай Іванаўнай Скрыган, якая шмат робіць для ўшанавання памяці свайго бацькі. Да юбілею яна падрыхтавала альбом “Фоталетапіс з хатняга архіва Яна Скрыгана”, які перадала з аўтографам ў дар бібліятэцы.
Мерапрыемства “Кругі лёсу Яна Скрыгана”. 12 лістапада 2020 г. Фота Н. Жарскай
У выданне ўвайшло некалькі соцень фатаграфій з архіва Яна Скрыгана, а таксама пазнейшыя фота яго сям’і, многія з якіх ніколі раней не публікаваліся. Кніга пазнаёміць з шэрагам фотаздымкаў з мерапрыемстваў, прысвечаных памяці пісьменніка, галерэяй партрэтаў. Фатаграфіі суправаджаюцца каментарамі.
Згодна з аўтарскім дагаворам, які бібліятэка заключыла з Галінай Іванаўнай, кніга “Фоталетапіс з хатняга архіва Яна Скрыгана” алічбавана і даступна кожнаму карыстальніку ў нашай электроннай бібліятэцы, а таксама ў прысвечаным пісьменніку раздзеле віртуальнага праекта “На хвалі часу, у плыні жыцця”.
Запрашаем усіх зацікаўленых да азнаямлення з гэтым каштоўным выданнем.
Матэрыял пададзены інфармацыйна-аналітычным аддзелам.