З 4 красавіка па 6 мая ў аддзеле абслугоўвання афіцыйнымі дакументамі (пам. 207) адкрыта тэматычная кніжная выстаўка “Будзь здаровы, чалавек”, прымеркаваная да Сусветнага дня здароўя.
Гэты Дзень быў заснаваны на першай сесіі Сусветнай асамблеі аховы здароўя ў 1948 годзе і штогод адзначаецца 7 красавіка, пачынаючы з 1950 года. Дата абрана не выпадкова – 7 красавіка 1948 года ўступіў у сілу Статут Сусветнай арганізацыі аховы здароўя (СААЗ).
У Статуце СААЗ здароўе вызначана як стан поўнага фізічнага, душэўнага і сацыяльнага дабрабыту, а не толькі як адсутнасць хвароб і фізічных дэфектаў. Імкненне да дасягнення ўсімі людзьмі планеты вышэйшага ўзроўню здароўя – асноўная мэта арганізацыі.
Мільёны людзей ва ўсім свеце разумеюць велізарную важнасць здароўя для прадуктыўнага і шчаслівага жыцця. У сучасным грамадстве, якое хутка трансфармуецца, каштоўнасць здароўя і здаровага ладу жыцця застаецца на вядучай пазіцыі, таму правядзенне Сусветнага дня здароўя з кожным годам прыцягвае ўсё большую ўвагу як глабальных лідараў, так і грамадскасці ва ўсіх краінах. Ахова і ўмацаванне здароўя людзей застаецца першачарговай задачай і для органаў дзяржаўнай улады ўсіх узроўняў, і для міжнародных і грамадскіх арганізацый.
Сусветны дзень здароўя – гэта глабальная кампанія, накіраваная на прыцягненне ўвагі кожнага жыхара нашай планеты да праблем здароўя і яго аховы. Ён дае ўнікальную магчымасць завастрыць увагу сусветнага супольніцтва на праблемах грамадскай аховы здароўя і пытаннях здароўя людзей і схіліць урады, міжнародныя арганізацыі, дзелавыя кругі і цывільнае грамадства да сумесных намаганняў, накіраваных на рашэнне гэтых праблем.
Кожны год правядзенне свята звязваецца з пэўнай тэмай. За апошнія гады пад час Дня здароўя былі падняты пытанні, якія датычацца псіхічнага здароўя чалавека, мацярынства, бяспекі на дарогах, уплыву кліматычных змен на здароўе чалавека, бяспекі медыцынскіх устаноў і г.д. Тэма Сусветнага дня здароўя ў 2012 годзе – “Старэнне і здароўе”.
Незалежна ад таго, дзе мы жывём, старэнне кранае кожнага з нас – маладых і пажылых, мужчын і жанчын, багатых і бедных. Прыцягваючы ўвагу да гэтай тэмы, СААЗ падкрэслівае, што добрае здароўе на працягу ўсяго жыцця дапамагае людзям пажылога ўзросту весці паўнавартаснае і прадуктыўнае жыццё і заставацца карыснымі для сваіх блізкіх і грамадства.
Працэс старэння ў XXI стагоддзі значна адрозніваецца ад таго, як праходзіла старэнне ў мінулым. На працягу наступных пяці гадоў упершыню ў гісторыі чалавецтва колькасць людзей ва ўзросце 65 гадоў і старэйшых перавысіць колькасць дзяцей ва ўзросце менш за пяць гадоў. У перыяд паміж 2000 і 2050 гг. доля насельніцтва старэйшага за 60 гадоў у свеце падвоіцца прыблізна з 11 % да 22 %. Чалавецтву неабходна пераасэнсаваць працэсы старэння. У Сусветны дзень здароўя СААЗ прапаноўвае задумацца, якое грамадства мы хочам стварыць, і разгледзець палітыку і дзеянні, якія неабходна праводзіць у жыццё з тым, каб прадбачыць старэнне насельніцтва і прымаць адпаведныя зваротныя меры, паставіўшы ў цэнтр увагі здароўе чалавека.
На выстаўцы прадстаўлена больш за 100 дакументаў: кнігі, брашуры і перыядычныя выданні. Вялікую частку складаюць дакументы міжнародных арганізацый (ААН, СААЗ, ЮНЕСКА, Еўрапейскага саюза, Савета Еўропы) на рускай і англійскай мовах.
Экспазіцыя ўключае наступныя тэматычныя раздзелы:
- Міжнародныя рэкамендацыі і стандарты ў галіне аховы здароўя.
- Ахова здароўя грамадзян у Рэспубліцы Беларусь.
- Здароўе маці і дзіцяці.
- Барацьба супраць інфекцыйных хвароб і ВІЧ/СНІДу.
- Вада, санітарыя і гігіена.
- Палітыка ў галіне здаровага ладу жыцця і лекаў.
- Старэнне і здароўе.
Выстаўка будзе карысная спецыялістам у галіне аховы здароўя, медыцынскім работнікам, навуковым супрацоўнікам, выкладчыкам, студэнтам вышэйшых навучальных устаноў, а таксама ўсім, хто цікавіцца праблемамі аховы здароўя і пытаннямі здаровага ладу жыцця.
Карысныя спасылкі:
Сістэма Арганізацыя Аб’яднаных Нацый
- Мадрыдскі міжнародны план дзеянняў па праблемах старэння
- Еўрапейская эканамічная камісія Арганізацыі Аб’яднаных Нацый
- Аддзел народанасельніцтва Арганізацыі Аб’яднаных Нацый
- Аддзел сацыяльнай палітыкі і развіцця Арганізацыі Аб’яднаных Нацый
- Птушыны грып
- Барацьба супраць ВІЧ/СНІДу
Сусветная арганізацыя аховы здароўя
- Сусветны дзень здароўя 2012
- Сусветныя дні здароўя мінулых гадоў
- Даклад пра стан аховы здароўя ў свеце
- Еўрапейскі рэгіён
- Тэма здароўя: старэнне
- Global Atlas of the Health Workforce
- WHO and the Millennium Development Goals
ЮНФПА
ЮНІСЕФ
Група Сусветнага банка