З 27 студзеня па 29 лютага ў Нацыянальнай бібліятэцы Беларусі (3-ці паверх, кальцавы калідор) арганізавана тэматычная выстаўка “Гісторыя і традыцыі беларускай навукі”, прысвечаная Дню беларускай навукі.
Навука Беларусі мае глыбокія гістарычныя карані. Яна ўвабрала ў сябе духоўна-інтэлектуальныя традыцыі, вопыт даследчай дзейнасці многіх пакаленняў навукоўцаў. Пасля абвяшчэння БССР развіццё навукі ішло асабліва хуткімі тэмпамі. У ХХ стагоддзі ў нашай краіне былі створаны не толькі нацыянальная сістэма арганізацыі навуковых даследаванняў, падрыхтоўкі навуковых кадраў, але і прызнаныя ва ўсім свеце навуковыя школы ў галіне лазернай фізікі, оптыкі і спектраскапіі, цеплафізікі, матэрыялазнаўства, фізіялогіі, хіміі, геалогіі, батанікі, генетыкі. Тым самым быў закладзены падмурак, на якім развіваецца беларуская навука сёння.
Уступленне Беларусі ў новы перыяд свайго развіцця, набыццё нацыянальнага суверэнітэту і незалежнасці паставілі перад беларускай навукай новыя задачы. Абапіраючыся на вопыт і навуковыя традыцыі мінулых пакаленняў, гэтыя задачы cучасныя вучоныя вырашаюць на больш высокім узроўні.
Экспазіцыя змяшчае каля 50 выданняў, якія выйшлі ў друк за апошнія пяць гадоў. Гэта даведачныя і энцыклапедычныя выданні пра гісторыю развіцця і сучасны стан беларускай навукі, зборнікі навуковых прац, матэрыялы навуковых міжнародных і рэспубліканскіх канферэнцый. Асобны раздзел выстаўкі прысвечаны выбітным постацям беларускай навукі, біяграфіі якіх прадстаўлены, у асноўным, кнігамі серыі “Людзі беларускай навукі”.
Выстаўка адрасавана шырокаму колу чытачоў і наведвальнікаў бібліятэкі.
Кантактны тэлефон: (8017) 293 28 86.