Мой Мінск, у сэрцы ты адзіны!

З 5 верасня па 8 кастрычніка праходзіць выстаўка “Мой Мінск, у сэрцы ты адзіны!”, прымеркаваная да Дня горада (14 верасня).

Нацыянальная бібліятэка Беларусі віншуе жыхароў і гасцей Мінска з Днём горада і запрашае наведаць святочную кніжную экспазіцыю (2-гі паверх, кальцавы калідор).

Мінск – сталіца і самы буйны горад Рэспублікі Беларусь з багатым гістарычным мінулым. Першае згадванне пра яго сустракаецца ў старажытнарускім летапісе “Аповесць мінулых гадоў” і адносіцца да 1067 года. З летапісаў дакладна вядома, што ў пачатку ХІІ ст. Мінск становіцца цэнтрам асобнага княства. З XIV ст. гісторыя горада звязана з Вялікім Княствам Літоўскім. Актывізацыя гаспадарчай дзейнасці Мінска спрыяла атрыманню ім у канцы XV ст. гарадскога самакіравання, а ў другой палове XVI ст. – статусу цэнтра Мінскага ваяводства. У 1919 годзе горад афіцыйна становіцца сталіцай Беларусі.

У пачатку трэцяга тысячагоддзя Мінск уваходзіць у лік 273 буйнейшых гарадоў свету з насельніцтвам больш за 1 млн чалавек і займае годнае месца сярод іх. Гэта сучасны еўрапейскі горад з развітай інфраструктурай, які мае свае афіцыйныя сімвалы: герб, сцяг і гімн.

Адгарнуць невядомыя старонкі жыцця беларускай сталіцы, пазнаёміцца з гісторыяй старажытнага і сучаснага Мінска з яго галоўнымі вуліцамі і плошчамі, архітэктурнымі збудаваннямі, манументальнымі помнікамі дапаможа прапанаваная кніжная выстаўка.

Структурна экспазіцыя складаецца з шасці частак.

Першы раздзел “Сталіца чароўнай краіны” ўключае кніжныя выданні, якія знаёмяць наведвальнікаў выстаўкі са сталіцай-прыгажуняй, расказваюць пра яе гістарычнае мінулае і сучасны стан.

Пра найбольш значныя прадпрыемствы горада, міжнародныя выстаўкі і дзелавыя форумы апавядаюць раздзелы “Цэнтр міжнародных камунікацый” і “Прамысловы і дзелавы цэнтр краіны”.

У раздзелах “Духоўнае жыццё Мінска” і “Горад ведаў” сабраны кнігі пра дзяржаўныя тэатры, музеі і вядучыя навучальныя ўстановы Мінска.

Мінск паўстае як спартыўная сталіца Беларусі ў раздзеле “Горад здароўя і высокіх сацыяльных стандартаў”. Тут паказваецца гісторыя спорту і алімпійскага руху горада, развіццё сацыяльнай сферы.

Экспазіцыя змяшчае каля 150 выданняў.

Кантактныя тэлефоны: (8 017) 293 28 86, 293 29 80.